अन्तर्राष्ट्रिय मापदण्डको फुटबल रंगशाला बनाउन ग्लोबल टेन्डर
पोखरा : पोखरामा अन्तर्राष्ट्रिय स्तरको फुटबल स्टेडियम निर्माण गर्न ग्लोबल टेन्डर आह्वान गरिएको छ । राष्ट्रिय खेलकुद परिषद् (राखेप)ले १० महिनामा काम सकिने गरी ग्लोबल टेन्डर आह्वान गरेको हो । १३औं सागलाई ध्यानमा राखी पोखराको फुटबल स्टेडियम निर्माण सम्पन्न गर्न टेन्डर आह्वानमा गरिएको पश्चिमाञ्चल क्षेत्रीय खेलकुद विकास समितिका अध्यक्ष खगराज पौडेलले बताए ।
अन्तर्राष्ट्रिय मापदण्डको स्टेडियममा ट्र्याक एन्ड फिल्ड, शौचालय, खेलाडी आराम कक्ष, मिडिया कक्ष, स्टोर रुम, कन्फ्रेन्स कक्षलगायत सुविधा हुनेछ । फुटबल मैदान विश्व फुटबल महासंघ (फिफा)ले तोकेको मापदण्डअनुसार निर्माण हुने जानकारी पनि पौडेलले दिए । ट्र्याक एन्ड फिल्डतर्फ अन्तर्राष्ट्रिय मापदण्डको आठ लेनको सेन्थेटिक ट्र्याक, एक सय र चार सय मिटरको ट्र्याक निर्माणका लागि टेन्डरमा आह्वान गरिएको छ ।
स्टेडियम २० हजार दर्शक क्षमताको हुनेछ । स्टेडियमलाई आधुनिक फ्लड लाइटसहित स्कोर बोर्ड, डिस्प्ले बोर्डसमेत निर्माण गरिनु पर्नेछ । आगामी मंसिर २ गतेसम्म टेन्डर खरिदका लागि अन्तिम समय दिइएको छ । स्टेडियममा टेलिभिजनका ठूला स्क्रिनसमेत जडान गरिनुपर्ने टेन्डरमा उल्लेख छ । ‘स्टेडियम निर्माणका लागि करिब एक अर्ब रुपैयाँ खर्च हुनेछ । स्टेडियम निर्माण हुने वा नहुने भन्ने धेरै शंकाको बीच टेन्डर आह्वान सफल भएको छ । सन् २०१९ को मार्चमा नेपालमा आयोजना हुन लागेको दक्षिण एसियाली खेलकुदका स्टेडियम तयार भइसक्नेछ’, पौडेलले भने ।
अन्तर्राष्ट्रिय स्तरको फुटबल स्टेडियम निर्माणले पोखरा खेलकुद पर्यटनको सहरका रूपमा समेत विकास हुने सहारा क्लब पोखराका अध्यक्ष केशव थापाले विश्वास गरे । २०४० सालमा पोखरामा भएको दोस्रो राष्ट्रिय खेलकुदका लागि निर्माण गरिएको पोखराको फुटबल स्टेडियम मर्मतसम्भारको अभावमा पछिल्लो समय जीर्ण बनेको थियो । ‘फुटबल खेल सञ्चालन भइरहँदा स्टेडियम भत्केर ठूलो दुर्घटना हुने डर पोखरावासीमा थियो ।
अब आधुनिक स्टेडियम निर्माण भएपछि पर्यटकीय सहर पोखरा खेलकुदका लागि राम्रो गन्तव्य बन्नेमा दुविधा छैन’, थापाले भने । उनले स्टेडियमको निर्माणले नेपालकै खेलकुद विकासमा महत्वपूर्ण फड्को मार्ने पनि बताए ।