राखेप च्याम्पियनसिप पूर्वनिर्धारित मितिमा नहुने
काठमाडौं : राष्ट्रिय खेलकुद परिषद् (राखेप) ले पहिलोपटक आफ्नै नाममा आयोजना गर्न लागेको ‘राखेप च्याम्पियनसिप’ पूर्वनिर्धारित मितिमा नहुने भएको छ । च्याम्पियनसिपको पर्याप्त गृहकार्य नभएकाले कात्तिक १५ गतेदेखि सुरु हुने भनिएको च्याम्पियनसिप केही समय पर सार्न लागिएको राष्ट्रिय खेलकुद परिषद् (राखेप) का सदस्यसचिव केशवकुमार विष्टले जानकारी दिए ।
सदस्यसचिव विष्टले च्याम्पियनसिपमा समावेश गरिएका खेलका संघ र विभिन्न उपसमितिले तदारूकताका साथ काम गर्न नसकेका कारण च्याम्पियनसिपको मिति पर धकेलिएको बताए । ‘च्याम्पियनसिप पूर्वनिर्धारित समयमै आयोजना गर्न सम्बन्धित खेल संघले पर्याप्त चासो दिएनन् । प्रतियोगितालाई व्यवस्थित र सफलतापूवर्क सम्पन्न गर्न गठन गरिएका उपसमितिहरू पनि क्रियाशील नहुँदा आन्तरिक तयारी राम्रो भएन । त्यसैले च्याम्पियनसिप केही समय पर सार्न लागिएको हो’, सदस्यसचिव विष्टले भने ।
च्याम्पियनसिपमा दुई हजार पाँच सयजना खेलाडी सहभागी हुने भनिए पनि सम्बन्धित संघको सुस्तता र उपेक्षाका कारण खेलाडी संख्या र पदकको टुंगो लगाउन नसकिएको उनले बताए । ‘संघहरूले कुन–कुन विधामा खेल सञ्चालन गर्ने, कति खेलाडीले प्रतिस्पर्धा गर्ने र पदक संख्या कति हुने भन्ने कोटा अझै निर्धारण गर्न सकेका छैनन् । संघहरूले कोटा निर्धारण गर्न नसक्दा पदकको संख्या पनि टुंगो लाग्न सकेको छैन । सोही कारणले पदक बनाउन पनि सकेका छैनौं’, विष्टले भने ।
प्रतियोगिता सञ्चालनका लागि गत असोज २१ गते सदस्यसचिव विष्टको अध्यक्षतामा सञ्चालन तथा व्यवस्थापन समिति गठन गरिएको थियो । समितिको बैठकले कात्तिक १५ गतेदेखि च्याम्पियनसिप आयोजना गर्ने निर्णय गरेको थियो । प्रतियोगिता सञ्चालनका लागि राखेपले विभिन्न सातवटा उपसमिति पनि गठन गरेको थियो । च्याम्पियनसिपको मस्कटका रूपमा मयुरलाई प्रयोग गर्ने निर्णयसमेत गरिएको थियो ।
च्याम्पियनसिप वार्षिक कार्यक्रममा परिसकेको भए पनि चौथो चौमासिकमा मात्रै बजेट स्वीकृत भएकाले कात्तिक महिनामा गर्न समस्या परेको सदस्यसचिव विष्टले बताए । ‘च्याम्पियनसिप अबदेखि हरेक वर्ष आयोजना हुन्छ तर, यो वर्ष प्रतियोगिताको बजेट चौथो चौमासिकमा मात्रै स्वीकृत भएको छ । त्यसैले पनि प्रतियोगिता केही समय पर सार्न लागिएको हो’, उनले भने ‘परिषद्को आन्तरिक तयारी र सम्बन्धित संघले पनि खेलाडी संख्या र कोटा निर्धारण नगरिसकेकाले १०÷१२ दिनपछि मात्र च्याम्पियनसिप आयोजना हुनेछ ।’
सदस्यसचिव विष्टले आगामी वर्षदेखि कार्यविधि र निर्देशिका बनाएर प्रतियोगिता बृहत् रूपमा आयोजना गरिने पनि बताए । उनले च्याम्पियनसिपको नयाँ मिति शुक्रबार बस्ने बैठकले टुंगो लगाउने बताए । उनले पहिले १५ दिनभित्र प्रतियोगिता सम्पन्न गरिसक्नुपर्ने प्रावधान राखिए पनि अब दुई महिनाको म्याद तोकिने जानकारी पनि दिए ।
राखेपको अध्यक्षसमेत रहेका युवा तथा खेलकुदमन्त्री राजेन्द्रकुमार केसीले भने च्याम्पियनसिपको मिति पहिले कहिले घोषणा गरियो र अहिले किन पर सार्न लागिएको हो भन्ने विषयमा आफूलाई कुनै जानकारी नभएको बताए । ‘च्याम्पियनसिप वार्षिक कार्यक्रममा परे पनि त्यसको टुंगो बोर्ड बैठकले बनाउनुपर्ने हो तर, च्याम्पियनसिपको विषयमा अहिलेसम्म बोर्ड बैठक पनि बसेको छैन र मन्त्रालयसँग सल्लाह पनि भएको छैन’, मन्त्री केसीले भने ।
अर्को वर्ष इन्डोनेसियाको जकार्तामा हुने १८औं एसियाली खेलकुद (एसियाड) लाई ध्यानमा राखी च्याम्पियनसिपमा विभिन्न २७ वटा खेल समावेश गर्ने निर्णय गरिएको थियो । च्याम्पियनसिपमा गल्फ, पौडी, आर्चरी, सेपाकताक्रो, लनटेनिस, साइक्लिङ, ट्रायथलन, सुटिङ, कुस्ती, जुडो, खो खो, बक्सिङ, स्क्वास, उसु, टेबुलटेनिस, ह्यान्डबल, फुटबल, भलिबल, कराँते, तेक्वान्दो, एथलेटिक्स, कबड्डी, ब्याडमिन्टन, बास्केटबल, भारोत्तोलन, हक्की र फेन्सिङ खेल समावेश गर्ने निर्णय गरिएको थियो ।
‘आगामी नौ महिनापछि इन्डोनेसियामा आयोजना हुने एसियाडमा खेलाडी सहभागी गराउन च्याम्पियनसिप आयोजना गर्न लागिएको हो’, सदस्यसचिव विष्टले भने । उनले सन् २०१९ मा नेपालमै आयोजना हुने भनिएको १३औं दक्षिण एसियाली खेलकुद (साग) का लागि आठौं राष्ट्रिय खेलकुद प्रतियोगिताका विजेता खेलाडीलाई सहभागी गराइने बताए । उनले च्याम्पियनबाट छनोट भएका खेलाडीलाई बन्द प्रशिक्षणमा राखिने जानकारी दिए । उनले छनोट भएका खेलाडीलाई सुरुको ६ महिना नेपालमै प्रशिक्षण दिने र त्यसपछि वैदेशिक प्रशिक्षण पठाइने बताए ।
पहिले २७ खेल समावेश गर्ने निर्णय भए पनि १८औं एसियाडमा सफ्ट टेनिससमेत समावेश गरिएकाले च्याम्पियनसिपमा २८ वटा खेल समावेश हुने जानकारी पनि सदस्यसचिव विष्टले दिए । उनले चिसो मौसम सुरु भएकाले पौडीको च्याम्पियनसिप सम्पन्न भइसकेको बताए । उनका अनुसार, च्याम्पियनसिप राखेप आफैंले नगरी सम्बन्धित राष्ट्रिय संघले सञ्चालन गर्नेछन् ।
प्रतियोगिता सञ्चालनका लागि बजेट भने परिषद्ले उपलब्ध गराउनेछ । च्याम्पियनसिप आयोजनाका लागि चार करोड ३२ लाख रुपैयाँ बजेट रहेको सदस्यसचिव विष्टले बताए । उनले च्याम्पियनसिप वार्षिक कार्यक्रममा समावेश भइसकेकाले बजेटको अभाव नहुने र बजेट विनियोजन भइसकेको बताए । ‘राखेप च्याम्पियनसिप वार्षिक कार्यक्रममा समावेश भइसकेको प्रतियोगिता हो । यसका लागि चार करोड ३२ लाख रुपैयाँ विनियोजन भइसकेको छ’, विष्टले अन्नपूर्ण पोस्ट्सँग भने ।