बाबुछोराले जिते अन्तर्राष्ट्रिय पदक
काठमाडौं : भारतको नयाँदिल्लीमा जारी विश्व पावरलिफ्टिङ प्रतियोगितामा नेपाललाई ऐतिहासिक सफलता प्राप्त भएको छ । प्रतियोगितामा सहभागी हुन गएका बाबुछोरा दुवैले उत्कृष्ट प्रदर्शन गर्दै पदक जितेर महत्वपूर्ण सफलता हात पारेका हुन् । प्रतियोगितामा बाबु ज्ञानेन्द्र नकर्मी र छोरा रोजिन नकर्मीले पदक जितेका हुन् । प्रतियोगिताको मास्टरतर्फको स्पर्धामा बाबु ज्ञानेन्द्रले रजत पदक हात पारे ।
यसैगरी छोरा रोजिनले प्रतियोगिताको सब जुनियर (१९ वर्षमुनि) स्पर्धामा कांस्य पदक हात पारेको हाल दिल्लीमै रहेका ज्ञानेन्द्रलाई उद्धृत गर्दै राष्ट्रिय खेलकुद परिषद् (राखेप)को प्रचारप्रसार शाखाले जनाएको छ । राजिन पहिलोपटक अन्तर्राष्ट्रिय प्रतियोगितामा सहभागी भएका हुुन् । यसअघि सन् १९१४ मा दिल्लीमै भएको प्रतियोगितामा भने नेपालका लागि ज्ञानेन्द्र श्रेष्ठले स्वर्ण पदक जितेका थिए ।
पावरलिफ्टिङ प्रतियोगितामा नेपाली खेलाडीले उत्कृष्ट प्रदर्शन गर्दै आएका छन् । सन् २०१४ मा पनि दिल्लीमै भएको सोही प्रतियोगितामा नेपालका बुद्धिजंग कार्कीले रजत पदक प्राप्त गरेका थिए । यसैगरी सन् २०१५ मा भारतको केरलामा भएको प्रतियोगितामा नेपालका ज्ञाननारायण महर्जन र सन् २००५ मा दिल्लीमा भएको प्रतियोगितामा दिनेश श्रेष्ठले कांस्य पदक हात पारेका थिए ।
प्रतिक्रिया दिनुहोस !
