गाईघाट : उदयपुरमा लागुऔषध कारोवारी र सेवनकर्ता धमाधम पक्राउ परिरहेका बेला प्रहरीले पहिलोपटक राइफलको गोली र लागुऔषधसहित एक जना कारोबारीलाई पक्राउ गरेको छ ।
प्रहरीले गोप्य सूचनाको आधारमा शनिबार राथि त्रियुगा नगरपालिका ६ जलजलेका ३२ वर्षे गणेश चौधरीलाई घरबाटै पक्राउ गरेको हो । घरबाटै लागुऔषधको कारोबार गरेको सूचनाका आधारमा घर खानतलासी गर्दा चौधरी पक्राउ परेको जिल्ला प्रहरी कार्यालयका प्रमुख एसपी नवराज भट्टले जानकारी दिए ।
चौधरीको घरबाट प्रहरीले ३ सय ३ राइफलको गोली २ थान, लागुऔषध नोफिन १, फेनेरागन १, डाइजाल्याब १ एम्पुल विभिन्न कम्पनीका मोवाइल ९ थान बरामद गरेको एसपी भट्टले जानकारी दिए ।
त्यसैगरी प्रहरीले एउटै व्यक्तिको नागरिकता ३ थान, सिरिञ्ज १ थान, रबरको स्ट्याम्प छाप १ थान बरामद गरेको छ । पक्राउ परेका चौधरीलाई प्रहरी हिरासतमा राखी अनुसन्धान प्रकृया अगाडी बढाइएको एसपी भट्टले जानकारी दिए ।
प्रतिक्रिया दिनुहोस !
