भैरहवा : २५६२औं बुद्धजयन्ती र अन्तर्राष्ट्रिय बौद्ध सम्मेलनको सुरक्षालाई ध्यानमा राख्दै लुम्बिनीमा सुरक्षा व्यवस्था कडा गरिने भएको छ । जयन्ती र सम्मेलनमा विभिन्न मुलुकबाट उच्च तहका व्यक्ति गौतम बुद्ध जन्मस्थल लुम्बिनीमा आउने भएकाले उनीहरूका साथै सम्मेलनमा सहभागी सर्वसाधारणको समेत सुरक्षार्थ लुम्बिनीमा सुरक्षा व्यवस्था कडा बनाइने भएको हो । सम्मेलन र जयन्तीका दिन सुरक्षा व्यवस्था चुस्तदुरुस्त राख्न सुरक्षा योजना बनाएर कार्यान्वयन भइरहेको रुपन्देहीका प्रमुख जिल्ला अधिकारी हरिप्रसाद मैनालीले जानकारी दिए ।
सुरक्षाका लागि नेपाल प्रहरी, सशस्त्र प्रहरी, राष्ट्रिय अनुसन्धान विभाग र नेपाली सेना गरी मुलुकका चार वटै सुरक्षा निकाय परिचालन गरिने प्रजिअ मैनालीले बताए । उनका अनुसार सम्मेलनमा हजारौं संख्यामा सुरक्षाकर्मी खटिनेछन् । ‘सोमबार साँझ बैठक बसेर सुरक्षा योजना बनाई कार्यान्वयनमा ल्याएका छौँ’, उनले भने, ‘बौद्ध सम्मेलन र बुद्धजयन्तीका दिन सुरक्षा व्यवस्थामा कुनै कमजोरी हुने छैन ।’ सम्मेलन र जयन्तीका लागि अमेरिका, थाइल्यान्ड, भारत, चीन, श्रीलंका, कोरिया, मलेसियालगायत २३ मुलुकबाट उच्च ओहोदाका व्यक्तित्व आउनेछन् । तीमध्ये १५ मुलुकका धार्मिक तथा संस्कृतिमन्त्रीले सम्मेलनमा सहभागिता जनाउने लुम्बिनी विकास कोषले जनाएको छ ।
कार्यक्रममा भिभिआईका लागि पहिलो घेरामा नेपाली सेना, दोस्रो घेरामा सशस्त्र प्रहरी र तेस्रो घेरोमा नेपाल प्रहरी तैनाथ रहने प्रमुख जिल्ला अधिकारी मैनालीले बताए । लुम्बिनीमा बौद्ध सम्मेलन र बुद्धजयन्तीको सुरक्षालाई ध्यानमा राख्दै सोमबार लुम्बिनीमा सुरक्षा बैठक बसेको हो । जसमा प्रदेश ५ का पर्यटनमन्त्री लीला गिरी, भौतिक पूर्वाधारमन्त्री बैजनाथ चौधरी, लुम्बिनी विकास कोषका उपाध्यक्ष अवधेशकुमार त्रिपाठी, रुपन्देही, कपिलवस्तु र नवलपरासीका प्रमुख जिल्ला अधिकारी, यी तीन वटै जिल्लाका प्रहरी प्रमुख, सशस्त्र प्रहरी बलका प्रमुख, सेनाको सहभागिता थियो ।
बैठकले भैरहवा–कपिलवस्तुमार्गमा सवारी जाम हुने हुँदा सम्मेलन र जयन्तीका दिन औद्योगिक करिडोरका सवारी राति मात्र चलाउन उद्योगी व्यवसायीलाई आग्रह गर्ने, लोडसेडिङ नगर्ने, बाटोको खाल्डाखुल्डी पुर्ने, सिद्धार्थनगर नगरपालिका, लुम्बिनी सांस्कृतिक नगरपालिका र लुम्बिनी विकास कोषले बुद्धत्व झल्किने गरी आआफ्नो क्षेत्रमा स्वागत गेट निर्माण गर्नेलगायत निर्णय भएको लुम्बिनी विकास कोषका निमित्त सदस्यसचिव एवं योजना प्रमुख सरोज भट्टराईले जानकारी दिए । यस वर्ष ‘लुम्बिनी, नेपालः भगवान बुद्धको जन्मस्थल, बौद्ध धर्मको उद्गम भूमि तथा विश्व शान्तिको मुहान’ भन्ने मूल नारासहित वैशाख १५ र १६ गते बौद्ध सम्मेलन आयोजना हुनेछ भने १७ गते बुद्धजयन्ती मनाइँदै छ ।
प्रतिक्रिया दिनुहोस !
