धरान : धरान उपमहानगरपालिकामा खानेपानीको मुख्य स्रोत सर्दु जलाधार क्षेत्र अतिक्रमणमा परेको छ । यहाँका बोटबिरुवा फँडानी गरी घरटहरा निर्माण हुन थालेको छ । यसले जलाधार क्षेत्रको अस्तित्व संकटमा परेको स्थानीयले बताएका छन् ।
तत्कालीन राजा वीरेन्द्र शाह २०३३ सालमा यहाँ आएका बेला साबिकका पाँचकन्या, विष्णुपादुका र घोपा गाविसका लागि खानेपानीको मूल भएको धरानमाथिको जंगल क्षेत्रलाई सर्दु जलाधार क्षेत्र नामकरण गरेका थिए । यहाँका २ सय ९ घरपरिवारलाई मोरङको पथरीमा जग्गा सट्टाभर्ना दिइएको थियो । स्थानीयले आफ्नो नामको जग्गा सरकारलाई हस्तान्तरण गरेका थिए । हाल भूमाफियाको मिलेमतोमा जलाधार क्षेत्र अतिक्रमण तीव्र भएपछि मुहान सुक्दै गई धरानमा खानेपानी समस्या भएको सरोकारवालाको भनाइ छ ।
सर्दु, खर्दु, तामाखामलगायत खोला आसपासको जंगल मासेर भूमाफियाले घडेरी प्लटिङ गरेपछि मुहान सुक्दा धरानमा खानेपानीको चरम अभाव भएको खानेपानी संस्थान धरानका प्रमुख रामकुमार श्रेष्ठले बताए । मुहान क्षेत्रको जंगल संरक्षणमा उपमहानगरपालिकाले चासो नदिएको उनको भनाइ छ ।
कांग्रेस धरानका सभापति तिलक राईले जलाधार क्षेत्रमा डोजर लगाएर प्लटिङ गर्दा पनि जनप्रतिनिधि मौन बस्नुले उनीहरूको पनि संलग्नता देखिएको बताए । जलाधार क्षेत्र संरक्षणका लागि कांग्रेसले भण्डाफोर अभियान सञ्चालन गर्ने चेतावनी उनले दिए । उपमहानगरपालिका र स्थानीय दलहरूबीच जलाधार क्षेत्रको १२ बिघा जग्गा भोगचलन गर्ने सहमति भएपछि भूमाफियाले जंगल मासेर प्लटिङ सुरु गरेको धरानका पूर्वउपमेयर कृष्णनारायण पालिखेले बताए । जग्गा भोगचलन गर्न सहमति जनाउनेमा मेयर तारा सुब्बा, कांग्रेस धरानका पूर्वसभापति किशोर राई, माओवादी केन्द्रका धरान इन्चार्ज चोत्लुङ र तत्कालीन कार्यकारी अधिकृत भोजराज खतिवडा रहेको जनाइएको छ ।
जलाधार क्षेत्र अतिक्रमणमा परेपछि मुहान सुक्न गई धरानमा खानेपानी अभाव भएको संस्थान प्रमुखको भनाइ ।
सरकारले रोक्का राखेको जमिन प्लटिङ हुन थालेपछि मालपोत र नापी कर्मचारीको मिलेमतोमा कित्ताकाट गरी रजिस्ट्रेसन पाससमेत भएको छ । अतिक्रमण तत्काल नरोकिएजलाधार क्षेत्रको अस्तित्व लोप हुने धरान–१३ का वडाध्यक्ष नेत्र काफ्लेले बताए । जलाधार अतिक्रमणमा संलग्नहरूमाथि छानबिन गरी कारबाही अघि बढाउनुपर्ने उनको माग छ । स्थानीयवासीले जलाधार क्षेत्र बचाउन सरकारसँग माग गरेका छन् । कांग्रेस सुनसरी क्षेत्र नम्बर १ का सहसचिव प्रेम राईले जलाधार अतिक्रणमा संलग्न सबैलाई कानुनी कारबाही गर्नुपर्ने बताए ।
जलाधार क्षेत्रको जग्गा बिक्रीवितरण रोक्न गर्न जिल्ला वन कार्यालय सुनसरीले मालपोत कार्यालय धरानलाई पत्रसमेत पठाएको थियो । तर, जिल्ला वन प्रमुख राजेन्द्र निरौला र इलाका वन प्रमुख ज्ञानकुमार लामाले सूर्य बुद्ध विहारलाई बुद्धको मूर्ति स्थापनाका लागि वन क्षेत्र भोगचलन गर्न अनुमति दिएपछि वन कर्मचारीसमेत विवादमा तानिएका छन् । जलाधार क्षेत्र अतिक्रमणमा परेको विषयमा मेयर सुब्बाले आफू केही नबोल्ने प्रतिक्रिया दिएका छन् ।
प्रतिक्रिया दिनुहोस !
