खाद्यान्नमा आत्मनिर्भर बन्दै सिन्धुली
सिन्धुली : कृषि क्षेत्रको आधुनिकीकरण र विस्तारसँगै सिन्धुली खाद्य सुरक्षाका दृष्टिले आत्मनिर्भर बन्दै गएको छ । वार्षिकरुपमा जिल्लामा खाद्यान्नवालीको उत्पादनमा वृद्धि हुँदै जान थालेपछि सिन्धुली खाद्यान्न उत्पादनले आत्मनिर्भर बन्दै गएको जिल्ला कृषि विकास कार्यालयले जनाएको हो ।
धान, मकै, कोदो, फापर, भटमास, गाहुँ, जौं जस्ता खाद्यान्न वार्षिकरुपमा १० देखि २० प्रतिशतसम्मले वृद्धि हुँदै जान थालेपछि जिल्ला खाद्यान्नमा आत्मनिर्भर बन्दै गएको पुष्टि भएको कार्यालयका प्रमुख होमराज विष्टले बताउँछन् । ‘जिल्लाको जनसंख्याका लागि प्रतिवर्ष आवश्यक पर्ने भन्दा ७ हजार २ सय ४८ मेक्ट्रिक टन खाद्यान्न पछिल्लो वर्ष हामी कहाँ बचत हुने गरेको छ,’ उनले भने ।
कार्यालयले तयार पारेको तथ्यांङ्क अनुसार जिल्लामा वार्षिक रुपमा ६६ हजार ७ सय ८३ मेक्ट्रिक टन खाद्यान्न उत्पादन हुने गरेको छ । उनले भने, ‘तर, जिल्लाको कुल जनसंख्याको आधारमा ५९ हजार ५ सय ३५ मेक्ट्रिक टनमात्र खपत हुन्छ । उत्पादनको तुलनामा ७ हजार २ सय ४८ मेक्ट्रिक टन खाद्यान्न बचत हुने गरेको छ ।’ यो खाद्यान्न जिल्लाबाट निर्यात गर्न सकिने उनले बताए ।
यस वर्ष खाद्यान्न उत्पादनमा वृद्धि हुने भएकाले थप खाद्य बचत हुने निश्चित छ । कृषि मन्त्रालयले सार्वजनिक गरेको तथ्यांङ्क अनुसार सिन्धुली लगायतका पहाडी जिल्लाहरुका लागि प्रति व्यक्ति २ सय १ केजी खाद्यान्न वार्षिकरुपमा आवश्यक पर्दछ । राष्ट्रिय जनगणना २०६८ अनुसार जिल्लाको कुल जनसंख्या २ लाख ९६ हजार १ सय ९२ रहेको छ । उक्त जनसंख्याका आधारमा वार्षिक ५९ हजार ५ सय ३५ मेक्ट्रिक टन भए जिल्लामा खाद्यान्न पुग्ने अधिकृत विष्टको भनाइ छ ।
जिल्लामा ६२ हजार ७ सय १३ हेक्टर क्षेत्रफलमा खेति हुन्छ । यस मध्ये गतवर्ष कै उत्पादनमा पशुपञ्छि आहार, उत्पादन क्षति, प्रशोधन, विउ विजन, भण्डारणमा हुने क्षति समेत जिल्लाकै उत्पादनले परिपुर्ति गर्न सकिने कार्यालयको विश्वास छ । यस वर्ष जिल्लामा गत वर्षको तुलनामा दोब्बर खाद्य उत्पादन हुने अनुमान गरिएको छ । जिल्लामा सबैभन्दा बढी मकै उत्पादन हुने गरेको छ । धान, कोदो गहुँ पनि जिल्लामा मकैपछिको राम्रो उत्पादन हुने वाली हो ।
जिल्ला सदरमुकाम, कमलाखोंच क्षेत्र, तिनपाटन बेलघारी, मरिण र सुनकोसीगढ जिल्लाको खाद्यान्न वाली उत्पादनका लागि पकेट क्षेत्रका रुपमा विकास गरिदै लगिएको छ । यस्ता क्षेत्रहरुमा आधुनिक प्रविधिबाट गुणस्तर र हावापानी सुहाउँदो विउ विजन वितरण जस्ता कार्यबाट कृषकहरुलाई थप उत्साहित गर्दै लगेको समेत कृषि कार्यालयले जनाएको छ ।