दमौली : विवाहित १७ वर्षीया किशोरीमाथि बलात्कारको आरोप लागेका घिरिङ गाउँपालिका–३ का वडाध्यक्ष झकबहादुर कुमालले घटना बाहिर नल्याउन पीडितलाई धम्की दिएका छन् । घिरिङ–४ गड्यौलीटारकी स्थानीय विवाहित किशोरीमाथि कुमालले नवलपरासी बर्दघाट पूर्वसुस्तास्थित जंगलमा गत मंगलबार बलात्कार गरेका थिए ।
पति विदेशमा रहेका स्थानीय ती किशोरीलाई धम्क्याएर बलात्कार गरेको र कुमालले घटना बाहिर नल्याउन भन्दै दुई हजार रुपैयाँको प्रस्ताव गरेका थिए । तर, पीडितका परिवारमार्फत घटना सार्वजनिक भएपछि अहिले उनी सम्पर्कविहीन छन् ।
पीडित किशोरीले घटना बाहिर नल्याउन कुमालले दिएको धम्कीका बाबजुद शुक्रबार जिल्ला प्रहरी कार्यालय तनहुँमा जाहेरी दिएकी छन् । पीडित युवतीका अनुसार उनलाई घरमा बसेका बेला राति ढोका खुला राख्न कुमालले अनुरोध गर्दै फोन गरेका थिए । वैशाख १७ गते साँझ ६ बजे कुमालले ती किशोरीलाई ढोका खुला राख्न फोन गरे पनि उनले मोबाइल अफ गरेर बसेकी थिइन् । सोही रात १० बजे फेरि उनले फोन गरेर ढोका खुला राख्न भने पनि ती किशोरीले अस्वीकार गरेकी थिइन् । प्रहरीमा उनले दिएको जाहेरीअनुसार कुमालले घटनाबारे कसैलाई नभन्न भनेका थिए । तर, उनले दिदी र सासूलाई घटनाबारे बताएकी थिइन् ।
पतिले पठाएको पैसा लिएर नवलपरासी बर्दघाटबाट मंगलबार घर फर्कने क्रममा कुमालले पिछा गरी जंगलमा लगेर बलात्कार गरेको पीडितले बताएकी छन् । ‘म जाँदै गर्दा मोटरसाइकलमा लगिदिन्छु भन्नुभयो’, उनले भनिन्, ‘पैसा झिकिसकेपछि पिछा गर्दै मोटरसाइकलमा लगिदिन्छु भन्दा म मानिनँ । तर, दिदी भएको ठाउँमा पु¥याइदिन्छु भनेर जंगलमा लगेपछि जबर्जस्ती भयो ।’
घटना सार्वजनिक नगर्न पैसाको प्रलोभन र धम्की आएपछि आफू बिहीबार मध्यरातमा आफन्तसँग जाहेरीका लागि दमौली आएको उनले बताइन् । शुक्रबार जाहेरी संकलनपछि प्रहरीले पीडित महिलाको बयान लिएर सम्बन्धित जिल्लामा पठाएको छ । जिल्ला प्रहरी कार्यालयकी महिला सेलकी प्रमुख कृष्णा बस्यालले घटना नवलपरासी बर्दघाट सुस्तापूर्वको भएका कारण जाहेरी लिएर र मेडिकल गरेर कानुनी प्रक्रियाका लागि पठाइएको जानकारी दिइन् ।
‘पीडितको जाहेरी र मेडिकल रिपोर्ट संकलन गरेर पठाएका छौं’, उनले भनिन् । घटनाबारे जानकारीका लागि वडाध्यक्ष कुमालसँग गरिएको सम्पर्कको सफल हुन सकेन । पीडितले भने सहयोगीमार्फत वडाध्यक्षले निरन्तर धम्की दिइरहेको बताएकी छन् ।
प्रतिक्रिया दिनुहोस !
