धादिङ : पृथ्वीराजमार्ग अन्तरगत धादिङको धुनीबेशी नगरपालिका–६ स्थित धार्के बजारमा रोकिराखेका दुई भारतीय कन्टेनर(ट्रक)मा गएराति अज्ञात समूहले आगजनी गरेको छ ।
राजमार्ग छेउमा रोकी राखेको ठाउँमै बिहान ३ बजेतिर आगजनी भएको इलाका प्रहरी कार्यलय खानीखोलाले जानकारी दिएको छ । आगजनीका कारण आर जे ४२ ग ५०२१ र आर जे ४२ ग ०७५६ नम्बरका दुई भारतीय कन्टेनर जलेर ध्वस्त भएका छन् ।
ट्रकमा आगो कसले र किन लगाएको भन्ने बारेमा अनुसन्धान भइरको प्रहरीले जनाएको छ । आइतबार विप्लव नेतृत्वको नेपाल कम्युनिष्ट पार्टीले नेपाल बन्दको भाषणा गरेको भएकाले सोही पार्टीका कार्यकर्ताले आगजनी गरेको हुनसक्ने प्रहरीले आशंका गरेको छ । विप्लव समूहले भने आगजनीको जिम्मेवारी लिएको छैन ।
ट्रकमा आगो लागेपछि आगो फैलिन नदिन स्थानीयबासी र प्रहरीले चारवटा डोजरको सहयोगमा आगलागी भएको ट्रक वरिपरि माटो हालेर आगो नियन्त्रणको प्रयास गरेका थिए ।
आगजनी भएको दुई घण्टापछि काठमाडांै महानगरपालिकाबाट दमकल पुगेपछि आयो पूर्ण रुपमा नियन्त्रणमा आएको थियो। आगलागीबाट मानवीय क्षति नभएपनि विद्युतको तार जल्दा उक्त क्षेत्रमा विद्युत सेवा अवरुद्ध भएको छ । आगजनी भएको क्षेत्र वरपर ग्यास स्टेशन, प्रेट्रोल पम्प र मानवबस्ती भएकाले केहीबेर उक्त क्षेत्रका स्थानीय त्रसित भएका थिए।
प्रतिक्रिया दिनुहोस !
