महोत्तरीः यहाँको गौशाला नगरपालिका–१ स्थित रामनगरमा रहेको एभरेस्ट चिनी मिलको बदमाशीका कारण हजारौँ किसान मारमा परेका छन् ।
उखु किने वापदको अर्बौँ रुपैयाँ तिर्न अटेर गर्दा किसान समस्यामा परेका हुन् । वैशाख महिना भित्र किसानलाई भुक्तानी गर्नुपर्ने रकमको सिलिङ निकाल्न दिइएको अल्टिमेटको बेवास्ता गरेपछि आइतवार एभरेस्ट चिनी मिलमा अनिश्चितकालिन तालाबन्दी गरेका छन् ।
देशका अन्य मिलले किसानको रकम धमाधम भुक्तानी गरिरहेको अवस्थामा एभरेस्टले मात्रै किसानसँग अटेर गरेको थियो ।
पुस ७ गतेदेखि चैत २४ गतेसम्म चलेको मिलले कुल ४२ लाख ५९ हजार ७ सय ७४ क्वीन्टल उखुबाट चिनी बनाएको थियो । मिलले त्यस क्रममा किसानको २ अर्ब २२ करोड १५ लाख ६७ हजार ३ सय ४८ रुपैयाँ बराबरको उखु खरिद गरेको थियो ।
जसमध्ये गत पुस महिनामा चलेरे चिनी तयार गरिएको ८ लाख ८० हजार क्वीन्टल उखुको मात्रै मिलले भुक्तानी दिएको थियो ।
मिलले तयार गरिएको चिनी नबिकेको भन्दै उखु किसानको एक अर्ब ७७ करोड ९९ लाख ७२ हजार ६५७ रुपैयाँ तिर्न अटेरी गरेको थियो । मिलको बदमाशीपछि किसानहरुले पटक पटक रकम दिन आग्रह गर्दै आएका थिए ।
३३ लाख ७९ हजार ५५६ क्वीन्टलको रकम किसानलाई भुक्तानी दिन बाँकी रहेको उखु उत्पादक कृषक संघका जिल्ला अध्यक्ष नरेशसिंह कुशवाहले जानकारी दिएका छन् ।
किसानहरुले पछिल्लो पटक गत वैशाख २५ गते मिलको नाममा पत्र लेखेर भुक्तानी दिनु भनेको उखुको रकम भुक्तानीको सिलिङ वैशाखभरीमा निकाल्न भनेका थिए । तर मिलले सिलिङ ननिकालेपछि किसानले ताला लगाउन बाध्य भएको कुशवाहले बताएका छन् ।
मिल प्रशासनले भने चिनी नबिकाकेले भुक्तानी गर्न नसकिएको जनाएको छ । किसानहरुले आइतवार मुख्य गेट, उखु विभाग, उखु प्रशासन, स्टोर र चिनी कारखानामा अनिश्चितकालका लागि तालाबन्दी गरेपछि मिल पनि ठप्प भएको छ ।
उखु उत्पादक महासंघका केन्द्रीय सदस्य महाशंकर सिंहका अनुसार किसानले मिलमा उखु बुझाएको ३० देखि ४५ दिनभित्र भुक्तानी दिने सहमति सरकारी अधिकारीसमेतको उपस्थितिमा भएको थियो ।
यो सहमतिमा उखु किसान महासंघ, कृषि मन्त्रालय र चिनी उत्पादक संघबीच भएको थियो । चिनी मिलले सरकारी अधिकारीसमेतको रोहबरमा गरिएको सहमति समेत पालना नगरेपछि किसानले मिलमा ताला लगाएका हुन् ।
प्रतिक्रिया दिनुहोस !
