बुटवल : सिद्धार्थ राजमार्गको सिद्धबाबा खण्डमा एक युवाको पहिरोमा परी मृत्यु भयो । पछिल्लो चार वर्षयता मृत्यु भएको व्यक्तिमध्ये उनी ३१ औं हुन् । शुक्रबार पहिरो छिचोल्दै बुटवल आउँदै गरेका मस्यामका मोहन रेग्मीको ढुंगाले थिचेर मृत्यु भयो ।
यो सडकमा सुरुङमार्ग बनाउने चर्चा भएको दशक भयो । बजेट भाषणमै लेखेर आएको पनि पाँच वर्ष भयो तर अहिलेसम्म काम भएको छैन । दुर्घटनाग्रस्त सडक निर्माणमा चासो नदिँदा बर्सेनि यात्रुको ज्यान जाने गरेको छ ।
अर्थमन्त्री युवराज खतिवडाले संसद्मा प्रस्तुत गरेको आर्थिक वर्ष ०७५÷७६ को बजेटमा पनि बुटवल पाल्पा सडकको सिद्धबाबा खण्डमा सर्वेक्षण गरी सुरुङमार्ग निर्माण थाल्ने उल्लेख छ ।
सुरुङमार्गको विषय ०७०÷७१ को बजेट वक्तव्यमा पहिलो पटक समावेश गरिएको थियो । खिलराज रेग्मी मन्त्रिपरिषद्को अध्यक्ष हुँदा तत्कालीन अर्थमन्त्री शंकर कोइरालाले प्रस्तुत गरेको बजेटमा सुरुङमार्ग निर्माणको सम्भाव्य अध्ययन गर्ने उल्लेख छ ।
भौतिक पूर्वाधार मन्त्रालयले सम्भाव्यता अध्ययन त ग¥यो तर डीपीआरको काम अघि बढ्न सकेको छैन । बजेटमा सिद्धबाबा क्षेत्रमा सुरुङमार्ग उल्लेख भएको ५ वर्ष भइसक्दा पनि यसको अहिलेसम्म डीपीआर बनेको छैन । यसअघि अर्थमन्त्री विष्णु पौडेल अर्थमन्त्री हुँदा ०७३÷७४ को बजेटमार्फत विस्तृत परियोजना प्रतिवेदन तयार गर्न बजेट छुट्याइएको थियो । ‘डीपीआर तयार हुनासाथ निर्मार्ण प्रारम्भ हुनेछ’ भनेर बजेटमा लेखिएको छ । तर, यात्रु अझै सिद्धबाबा पहिरोको स्थायी समाधान हुन्छ भनेर ढुक्क हुन सकेका छैनन् ।
पाल्पा तिनाउ गाउँपालिका दोभानका दलबहादुर गुरुङ भन्छन्, ‘सुरुङमार्ग, सेमिटनेल भन्ने नारा धेरै सुनिए केही काम भएको देखिएको छैन । मानसिक त्रासले सिद्धबाबा क्षेत्र ओहोर दोहोर गर्नुपरेको छ ।’ २ वर्षअघिकै बजेटमा डीपीआरका लागि बजेट छुट्ट्याइए पनि सुरुङमार्गसम्बन्धी कुनै बजेट आफ्नो डिभिजनमा नआएको डिभिजन सडक कार्यालय पाल्पाले जनाएको छ ।
‘अध्ययन केन्द्रबाटै भयो होला तर सुरुङमार्ग निर्माणका लागि भनेर हाम्रोमा बजेट आएको छैन’ डिभिजन सडक कार्यालय पाल्पाका इन्जिनियर पवित्रमणि आचार्यले भने ।
मन्त्रालय तथा सडक विभागका अधिकारी सुरुङमार्ग कठिन योजना ठान्छन् । ‘सडकका लागि नेपालमा कहीँ अभ्यास भएको छैन । समस्या त्यहीँबाट सुरु हुन्छ,’ सडक विभागका प्रवक्ता मुक्ति गौतमले भने, ‘अह्राउने र भन्नेलाई त सजिलै हुन्छ । गर्नेलाई थाहा हुन्छ कत्तिको गाह्रो छ भन्ने ।’ सुरुङमार्ग बनाउँदा त्यससँगै वैकल्पिक मार्ग पनि हुनुपर्ने बताउँछन् । ‘सुरुङमार्गभित्र दुर्घटना भयो भने उद्धार गर्न अर्को वैकल्पिक मार्ग पनि चाहिन्छ,’ गौतमले भने ।
सडक विभागले अहिले सिद्धबाबा क्षेत्रमा तिनाउपारिबाट सडक लैजानेबारे पनि अध्ययन गर्ने भएको छ । ‘सुरुङमार्ग बन्यो भने पनि एउटा वैकल्पिक मार्ग चाहिन्छ त्यसैले १० किलोमिटरजति सडक तिनाउपारिबाट बन्न सक्छ कि भन्नेबारे अध्ययन गर्छौं,’ उनले भने ।
सुरुङमार्ग बन्ने भयो भने पनि ३–४ वर्ष लाग्ने विभागको भनाइ छ । सिद्धार्थ राजमार्गको सिद्धबाबा क्षेत्रको पहिरो यातायात क्षेत्रको टाउको दुखाइको विषय बनेको छ । बुटवलबाट पश्चिमाञ्चलका पहाडी जिल्लामा जाने र आउने हजारौं यात्रुलाई सिद्धबाबाकै पहिरोले झस्काउने गर्छ । ०७४ साउनयता मात्र सिद्धबाबा क्षेत्रमा पहिरोमा परेर ४ जनाले ज्यान गुमाइसकेका छन् । ७ जना घाइते भएका छन् । ६ वटा सवारीसाधनमा क्षति पुगेको पश्चिम क्षेत्रीय ट्राफिक प्रहरी कार्यालय बुटवलले जनाएको छ । ४ वर्षयता तल्लो सिद्धबाबाबाट झुम्सासम्मको क्षेत्रमा दुर्घटनामा परी ३० जनाभन्दा बढीले ज्यान गुमाएका छन् । त्यसमध्ये धेरैको ढुंगा खसेर र पहिरोमा परी ज्यान जाने गरेको छ ।
प्रतिक्रिया दिनुहोस !
