सियोल : दक्षिण कोरियाका राष्ट्रपति 'मुन जे इन'ले भूकम्पपछिको पुनर्निर्माणका लागि नेपाललाई सहयोग जारी राख्ने प्रतिवद्धता व्यक्त गरेका छन् । दुर्इ वर्षअघि नेपालको भूकम्प प्रभावित क्षेत्रको भ्रमण गरी उद्धारमा सहयोग गरेको माध्यमिक विद्यालयलाई व्यक्तिगत रुपमा फेरि १ करोड ३५लाख वोन अर्थात १३ लाख ४८ हजार २०० रुपैयाँ सहयोग गरेका छन् ।
नेपालमा २०१५ मा गएको ७.८ म्याग्निच्यूडको भूकम्पका कारण क्षतिग्रस्त भएको नुवाकोटको आरुखर्क माध्यमिक विद्यालयमा राष्ट्रपति मून र उनका सहयोगीले श्रमदान र आर्थिक सहयोग गरेका थिए । मुन दक्षिण कोरियाको राष्ट्रपति बन्नुभन्दा पहिल्यै सन २०१६ को जुनमा भूकम्प प्रभावित क्षेत्रमा सहयोगका लागि नेपालमा पुगेका थिए ।
मुन नेपालको भ्रमण रहेका बेला दक्षिण कोरियाको राष्ट्रपति रहेकी 'पार्क ग्युन हे' भ्रष्टाचार अभियोगका कारण अपदस्थ भएपछि मे २०१७ मुन राष्ट्रपतिमा निर्वाचित भएका थिए। नेपाली र कोरियन मिडियामा उनले नेपालमा गरेको सहयोगको चर्चा भएको थियो ।
राष्ट्रपति मुनले भूकम्पपछि भ्रमणका बेला आरुखर्कका बालबालिका र स्थानीयलाई आफ्नो सहयोग जारी राख्ने बताएका थिए । सोही प्रतिबद्धता अनुरुप पुनः सहयोग गरिएको जानकारी राष्ट्रपति कार्यलय ब्लू हाउसले जनाएको छ । राष्ट्रपति मुनले केही महिनाअघि आफूले श्रमदान र सहयोग गरेको विद्यालयको पुर्ननिर्माणका बारे चासो राखेका थिए।
सो क्रममा बजेट अभावका कारण सम्पन्न हुन नसकेको जानकारी पाएका थिए। त्यसपछि राष्ट्रपति मुनले आफू र आफ्नो सहयोगीबाट १ करोड ५० लाख वोन संकलन गरेका हुन् । १ करोड ५० लाख वोन मध्ये विद्यालयलाई १ करोड ३५ लाख र बाँकी १५ लाख वोन विद्यालय पुर्ननिर्माणमा जुटेका कामदारलाई स्वास्थ्य उपचारका लागि राष्ट्रपति मुनले सहयोग गरेका छन् ।
प्रतिक्रिया दिनुहोस !
