काठमाडौं : बन्दीप्रत्यक्षीकरणका मुद्दा हेर्ने नहेर्ने निर्क्योल गर्न प्रधानन्यायाधीशबाहेकका न्यायाधीशहरु आन्तरिक छलफलमा जुटेका छ्न् । तिहारअघि न्यायाधीशहरुले बन्दीप्रत्यक्षीकरणका मुद्दाहरु हेर्दै आएका थिए । प्रधानन्यायाधीश चोलेन्द्र शमशेर जबराले सोमबार आफूलाई पनि इजलास तोकेका छन् । जबराले पूर्वसहमतिविपरीत आफैलाई पेसी तोकेपछि न्यायाधीशहरू असन्तुष्ट छन् ।
प्रधानन्यायाधीशले सोमबार ६ वटा इजलास तोकेका छन् । जसमध्ये एक इजलाश प्रधानन्यायाधीश आफैका लागि तोकेका हुन्। सोमबार ७ मुद्दाको पेशी तोकिएको सर्वोच्चको दैनिक पेसी सूचीमा उल्लेख छ । पेशी तोकिएका सबै मुद्दा बन्दीप्रत्यक्षीकरणसँग सम्बन्धित छन् । प्रधानन्यायाधीशको राजीनामा माग गर्दै न्यायाधीशहरुले पनि मार्ग प्रशस्त गर्न आग्रह गर्दै आएका छन् ।
तर, प्रधानन्यायाधीश जबरा राजीनामा दिने मुडमा छैनन्। उनले न्यायाधीशसँगको छलफलमा आफूलाई वैशाखसम्म काम गर्न दिन प्रस्ताव अघि सारेका थिए। तर न्यायाधीश र कानुन व्यवसायीहरु जबराले राजीनामा नदिएसम्म काममा नफर्किने बताउँदै आएका छन्।
सर्वोच्चकै न्यायाधीश र कानुन व्यवसायीहरु आन्दोलित भएपछि नियमितरुपमा इजलास बस्ने सकेको छैन। इजलास नबस्दा मुद्दाको सुनुवाइ प्रभावित भएको छ।
प्रतिक्रिया दिनुहोस !
