धान रोपेर मनाए पर्यटकले असार पन्ध्र

पोखरा : पोखरामा पर्यटकले धान रोपेर हिलो खेल्दै असार १५ मनाएका छन् । पोखरा लेखनाथ महानगरपालिकाको बाटुलेचौरस्थित ठूलीबेसी फाँटमा बिहीबार भएको रोपाइँ महोत्सवमा पर्यटकले हलो जोत्ने, हिल्याउनेदेखि धानसमेत रोपेर नेपाली परम्परागत कृषि प्रणालीको अनुभव लिएका छन् ।

कृषि पर्यटनको माध्यमबाट पोखरामा पर्यटकको बसाइ लम्ब्याउने उद्देश्यले विगत १३ वर्षदेखि पोखराका पर्यटन व्यवसायीको छाता संगठन पोखरा पर्यटन परिषद्ले रोपाइँ महोत्सव गर्दै आएको हो । १४ औं रोपाइँ महोत्सवको उद्घाटन पोखरा महानगरपालिकाका मेयर मानबहादुर जीसीले गर्नुभएको थियो । महोत्सवमा सहभागीका लागि अमेरिकाको रोष्डम विश्व विद्यालयका विद्यार्थी पनि नेपाली परम्परागत कृषि प्रणालीको अध्ययन गर्न आएका छन् ।

यो विश्वविद्यालयबाट बिगतका वर्ष पनि यहाँको परम्परागत खेतीप्रणलीको अनुभव लिन विद्यार्थी र प्राध्यापकको टोली आउने गरेको थियो । यस पटक जापान, सिंगापुर, चीन, जर्मन, इटाली, फ्रान्स, इरानलगायत २२ भन्दा बढी देशका करिब पाँच सय पर्यटक महोत्सवमा सहभागी भएको पोखरा पर्यटन परिषद्का अध्यक्ष केदारनाथ शर्माले जानकारी दिनुभयो । महोत्सवमा ३० हजारभन्दा बढी आन्तरिक पर्यटकको सहभागिता रहेको परिषद्का उपाध्यक्ष भरतराज पराजुलीले सुनाउनुभयो । पछिल्लो समय पोखराका फाँट कंक्रिट जंगलमा परिणत हुँदै गएपछि आन्तरिक पर्यटक पनि असारे महोत्सवमा हिलो खेल्न ओइरोलाग्ने गरेका छन् ।

हलो जोत्ने, कान्ला खन्ने, आली लगाउने र रोप्ने काममा पर्यटक स्वयं सहभागी हुने र यसले महोत्सवलाई थप रमाइलो बनाएको परिषद्का अध्यक्ष शर्माले बताउनुभयो । पर्यटक नेपाली पञ्चेबाजामा नाचगान, गरेर रमाइलोका साथ दही च्यूरा खाएर रोपाइँ महोत्सवमा सहभागी भएका थिए । पहिलोपटक नेपाल आएकी न्युजिल्यान्डकी पर्यटक ज्याज हकले हलो जोत्दै धान रोप्ने कामले मानव र जनावरबीचको अनौंठो सम्बन्धका बारेमा जान्ने अवसर मिलेको बताउनुभयो । परम्परागत संस्कृतिसँगै गीत गाउँदै नाच्दै हिलोमा खेलेर धान रोप्ने परम्पार आफूलाई निकै राम्रो लागेको उहाँले बताउनुभयो । अमेरिकाकी पर्यटक मलिया डोरभानोले असारे महोत्सव निकै रमाइलो र अनौंठो लागेको बताउनुभयो ।

रोपाइँ महोत्सवमा विदेशी र नेपालीबीच रस्साकस्सी, माछा समाउने, हिलोमा दौड जस्ता आकर्षण र प्रतियोगिता पनि भएको थियो । प्रतियोगिताका विजेतालाई पुरस्कार प्रदान गरिएको महोत्सवका संयोजक नवराज अधिकारीले बताउनुभयो । नेपालमा धान दिवसका रूपमा समेत असार १५ लाई मनाइन्छ । असार १५ मा एकपटक हिलो छुनैपर्छ भन्ने पुरानो मान्यतालाई साकार पार्दै कृषकलाई सम्मान गरिएको उहाँले बताउनुभयो ।

पर्यटकलाई हरेक मौसममा उत्तिकै रूपमा पोखरा भित्र्याउने र पोखरा हरेक मौसमका लागि भन्ने भनाइलाई चरितार्थ गर्ने उद्देश्यले महोत्सव आयोजना गरिएको संयोजक अधिकारीले जानकारी दिनुभयो । पोखरामा खेतीयोग्य जमिन मासिँदै गएकाले भूमि जोगाउन महोत्सवमा सचेतनामूलक कार्यक्रम गरिएको थियो । पछिल्लो समय पोखरामा प्लटिङका कारण खेतीयोग्य जमीन मासिँदै गएको छ ।