तौलिहवा : गर्मीका कारण विक्रीका लागि तयार भएका माछा मरेपछि कपिलवस्तुका किसान निराश भएका छन् । केही दिन यता बढेको गर्मीले पोखरीका माछा मरेपछि कपिलवस्तुका मदन यादव मुर्छा नै भए । दुई दिनपछि बिक्री गर्ने भन्दै उनले व्यापारीलाई खबर समेत गरेका थिए । तर २८ गतेको गर्मीले पोखरीमा रहेका ९६ प्रतिशत (८० हजार) माछा मरेका थिए । २७ र २८ गते जिल्लाको तापक्रम ४४ डिग्रीसम्म पुगेको जल तथा मौसम मापन बिज्ञान बिभागका कपिलवस्तु इकाई रामनगरका रामु रेग्मीले बताए ।
यादवले गत बर्षदेखी ४४ कठ्ठा जग्गामा व्यवसायिक माछापालन थालेका हुन् । माछापालन थालेको एक बर्ष नहुँदै लाखौका माछा मरेपछि किसान यादव अहिले चिन्तामा छन् । बेच्न लागेका माछा एकाएक मर्दा ५० लाख नोक्सान भएको उनले बताए । ‘माछा बेचेर एक बर्ष अगाडि बनाएको पोखरीको ऋण चुक्ता गरौंला भन्ने सोचेको थिएँ । ऋण तिर्न त के कुरा लगानी पनि डुब्यो’, बाणगंगा, ठुलो गलाहका किसान यादवले भने । कपिलवस्तुमा बजार र खपतका दृष्टिले व्यवसायिक माछापालन फौस्टाउँदै गए पनि पानीको सतह घट्दै जाँदा किसान समस्या परेका छन् ।
लाखौं रूपैयाँका माछा मरेपछि यादवले स्थानीय जनप्रतिनिधिसँग सहयोग माग गरेका छन् । विमा नगरेका कारण उनले क्षतिपूर्ति पाउने सम्भावना भने कम छ । पोखरी अवलोकन गर्न पुगेका जनप्रतिनिधिले केही राहत रकमका लागि सहयोग गर्ने आश्वासन दिएका छन् । वाणगंगा नगरपालिकाका कृषि शाखा प्रमुख धनिराम आचार्यलगायतको टोलीले यादवको माछापोखरी अवलोकन गरेका थिए ।
नगरका उपमेयर चक्रपाणी अर्यालले यादवलाई सहयोगको लागि प्रदेश र केन्द्र सरकारसँग समन्वय गर्ने बताए । ‘माछाको विमा नगरेकाले ठूलो क्षति बेहोर्नुप¥यो’, उनले भने । मांगुर जातको माछा सानो पोखरीमा पनि धेरै पाल्न सकिन्छ । यादवले गत बर्षमात्र दुई पोखरी निर्माण गरेर माछापालन थालेका थिए । दुई पोखरीमा गरि उनले १ लाख ६९ हजार भुरा राखेका थिए । जसमध्ये ८६ हजार माछा राखिएको पोखरीका माछा मरेका हुन् ।
प्रतिक्रिया दिनुहोस !
