ओखलढुंगाः अनुमति विना सञ्चालन गरिएको निजी विद्यालयका सञ्चालकलाई प्रहरी पक्राउ गरेको छ । सिद्धिचरण नगरपालिका – २ निसंखेबजारमा बलराम कटुवालले अनुमति विना गुरुकुल एकेडेमी नामको निजी विद्यालय सञ्चालन गर्ने बलराम कटुवाललाई प्रहरीले पक्राउ गरेको हो ।
चिसंखुगढी गाउापालिका–६ का कटुवालले कम्प्युटर इन्स्टिच्यूट सञ्चालन गरेको स्थानमै सवारी साधानसमेत राखेर दर्ता विनै गुरुकुल सञ्चालन गर्दै आएका थिए । स्थानीय तहबाट अनुमति दिनु पर्ने व्यवस्था भए पनि कुनै प्रकृया नै नपु¥याई अभिभावक र विद्यार्थीलाई ठगी गरेको उजुरीका आधारमा सञ्चालक कटुवाललाई प्रहरीले शनिबार पक्राउ गरेको छ ।
पक्राउ परेका कटुवाललाई हिरासतमा राखेर अनुसन्धान भइरहेको जिल्ला प्रहरी कार्यालयका प्रहरी नायव उपरीक्षक अनन्तराम शर्माले जानकारी दिए । उनलाई म्याद थप गरेर अदालत पेश गरिने उनले बताए । वडास्तरबाट सिफारिस लिएर नगरपालिकाले दर्ता गर्ने व्यवस्था भए पनि विना दर्तै विद्यालय सञ्चालन भएको वडाध्यक्ष कृष्ण कार्कीले बताए । ‘दर्ताका लागि कुनै निवेदन वडामा आएको छैन,’ उनले भने ।
कटुवालले बस राखेर विना दर्ता झुक्याएर विद्यार्थीको भविष्यमाथि खेलबाड गरेको भन्दै स्थानीयले प्रहरीमा उजुरी गरेका थिए । प्रहरीले उनलाई पक्राउ गरेर शिक्षा ऐन ०७४ अनुसार दर्ता विना विद्यालय सञ्चालन गर्नेमाथि सरकारवादी फौजदारी मुद्दासरह हुने गरी कारवाही अघि बढाइने जनाएको छ ।
प्रतिक्रिया दिनुहोस !
