तौलिहवा : कृष्णनगर बजारमा रहेको महेन्द्र पार्क व्यक्तिले कब्जा गरेको छ । ०१५ सालमा निर्माण भएको उक्त पार्क स्थानीय रुद्रप्रताप शाहले निजी प्रयोजनका लागि प्रयोग गरिरहेका छन् । रुद्रप्रताप, प्रतिनिधिसभाका सांसद अभिषेकप्रताप शाहका हजुरबुबा हुन् । उनको परिवारले पार्कछेउमा निर्माण गरिएको भवनको भाडासमेत उठाउने गरेका छन् । नेपाल–भारत सीमानाकासँग जोडिएको महेन्द्र पार्क कृष्णनगरका शिवप्रताप शाह तत्कालीन अर्थ राज्यमन्त्री हुँदा राजा महेन्द्रले निर्माण गर्न लगाएका थिए । राजा महेन्द्रले सभा, समारोह, सम्मेलन र नेपाल भारत आवातजावत गर्ने सर्वसाधारणलाई बसोबासको प्रबन्ध मिलाउन पार्कका लागि जग्गा उपलब्ध गराएका थिए ।
राजा महेन्द्रले उपलब्ध गराएको उक्त जग्गामा आकर्षक पार्क र सार्वजनिक पुस्तकालय निर्माण गर्ने योजना छ । तर, रुद्रप्रताप शाह परिवारको कब्जामा रहेपछि पार्क प्रयोगमा आउन नसकेको स्थानीय दिनेशचन्द्र गुप्ताले बताए । ‘राज्यबाट पार्क निर्माण गर्न लाखौं रुपैयाँ आएको छ’, उनले भने, ‘तर यस विषयमा बोल्न पनि गाह्रो छ ।’
प्रतिनिधिसभा सदस्य अभिषेकप्रताप शाहले आफू सांसद हुँदा सांसद विकास कोषको लाखौं रुपैयाँ यही पार्क निर्माणमा खर्च गरे । तर, न पार्क निर्माण भयो न त अरूले नै प्रयोग गर्न सकेका छन् । ०१५ सालदेखि शाह परिवार कांग्रेस, राप्रपा, मधेसवादी दलबाट राज्यका विभिन्न ओहोदामा पुग्दै आएका छन् ।
राजनीतिक रूपमा शक्तिशाली मानिएका शाह परिवारले कब्जा गरेको पार्कको विषयमा कुनै तहले प्रश्न उठाएको छैन । शाह परिवारकै कारण पार्कका विषयमा कुरा उठाउन नसकिएको स्थानीय प्रभाव भण्डारीले बताए । पार्कलाई एउटा परिवारले मात्रै कमाइ खाने भाँडो बनाउँदै आएको उनको आरोप छ । विभिन्न समयमा महेन्द्र पार्कलाई सार्वजनिक रूपमा प्रयोग गर्ने प्रस्ताव आएको थियो । तर, शाह परिवारले छाड्न मानेको छैन । त्यसविरुद्ध दबाब पनि सिर्जना हुन सकेको छैन । स्थानीय कृष्णकुमार गुप्ताले भने, ‘पार्कको विषयलाई उठाउँदै आएका छौं ।’
महेन्द्र पार्कको व्यवस्थापन गर्न भनेर वन विभाग, जिविस, गाविस, संसदीय विकास कोष हुँदै नगरपालिकाबाट समेत बजेट निकासा हुँदै आएको छ । झन्डै एक बिघा क्षेत्रफलमा अवस्थित पार्कको स्वामित्वमा आठ वटा सटर रहेको भवन निर्माण गरिएको छ । ३० को दशकदेखि ती सटरको भाडा रुद्रप्रताप शाह परिवारले लिँदै आएका छन् । प्रतिसटर महिनाको दुई हजारका दरले रुद्रप्रताप शाहलाई भाडा बुझाउँदै आएको कनोडिया वस्त्रालयका व्यापारीले बताए ।
पार्क कब्जा गरिरहेका रुद्रप्रताप शाहले भने यसबारे केही बोल्न मानेनन् । कृष्णनगर नगरपालिकाले पनि महेन्द्र पार्कलाई आफ्नो नियन्त्रणमा राख्न सकेको छैन । नगरपालिकाका मेयरसमेत शाह परिवारबाटै भएकाले पार्कको विषयमा चासो नदिएको नगरपालिकाका कर्मचारीको भनाइ छ ।
प्रतिक्रिया दिनुहोस !
