करेन्ट लागेर एकको मृत्यु, चार घाइते
भीमदत्तनगर : कञ्चनपुरको भीमदत्तनगरपालिकामा आइतबार करेन्ट लागेर एकको मृत्यु भएको छ भने चारजना घाइते भएका छन्। भीमदत्तनगरपालिका-३ मालिकार्जुन टोलमा बिजुलीको नयाँ खम्बा हाल्ने क्रममा करेन्ट लागेर कञ्चनपुर, लालझाँडी गाउँपालिका-५ देखतभुलीका २४ वर्षीय शिवराज रानाको मृत्यु भएको जिल्ला प्रहरी कार्यालयका प्रवक्ता ज्ञानबहादुर सेटीले जानकारी दिएका छन्।
सोही क्रममा देखतभुलीका जयना राना र समीर चौधरी तथा कृष्णपुर नगरपालिका-६ का अनिल चौधरी र कैलालीको धनगढी उपमहानगरपालिका-१६ उर्माका बालकृष्ण चौधरी घाइते भएका छन् ।
शिवराजलाई उपचारका लागि महाकाली अञ्चल अस्पताल लैजाँदै गर्दा बाटामै मृत्यु भएको थियो । घाइतेको महाकाली अञ्चल अस्पतालमा उपचार भइरहेको छ। रासस