भारतले रोक्दा गोलभेंडा बिक्नै गाह्रो
धनकुटा : सहिदभूमि गाउँपालिका-६ थलेथलेका राजकुमार राईले ३ हजार गोलभेंडा बिरुवा रोप्दा गत वर्ष २ लाख रुपैयाँ नाफा कमाए । यो सिजनमा झन्डै ५ हजार बिरुवा रोपेका उनको १० रोपनी जग्गामा अहिले गोलभेंडा पाकेर राताम्मे भएको छ । तर, बिक्री नहुँदा उनी निराश छन् ।
वडा नम्बर ३ का पुष्ट राईको सात रोपनी बारीमा पनि गोलभेंडा पाकेर बारीमै कुहिन थालेको छ । उनले गत वर्ष खर्च कटाएर ५ लाख रुपैयाँ आम्दानी गरेका थिए ।
बजार र भाउ नपाउँदा गोलभेंडाको व्यावसायिक गर्दै आएका किसान निराश बनेका छन् । भारतले गोलभेंडा आयातमा रोक लगाएको भन्दै व्यापारीले खरिद नगर्दा किसानलाई सास्ती भएको हो । गत वर्ष यही बेला किसानले गोलभेंडाको भाउ प्रतिकिलो ३० देखि ३५ रुपैयाँसम्म पाएका थिए । तर, अहिले प्रतिकिलो ५ रुपैयाँमा पनि बिक्न छाडेको स्थानीय राजकुमार राईले बताए । सस्तोमा बिक्री गर्नुभन्दा बरु बारीमै कुहियोस् भनेर आफूले गोलभेंडा नटिपेको उनको भनाइ छ । ‘५ लाख लागत खर्चसमेत नउठ्ने भएपछि निद्रा हराएको छ’, उनले भने ।
पहिला घरमै आएर गोलभेंडा मोलमोलाइ गरी अग्रिम भुक्तानी दिएर जाने व्यापारीले अहिले फोन गर्दा पनि बेवास्ता गर्न थालेको किसान पुष्टले बताए । गत वर्ष प्रतिकिलो ७० रुपैयाँसम्म गोलभेंडा बिक्री गरेको तर अहिले ३ देखि ५ रुपैयाँमा पनि बिक्न गाह्रो परिरहेको थलथलेकी भावना राईले बताइन् । सिजनको अन्तिमसम्ममा पनि यस्तै अवस्था रहे किसान धेरै मारमा पर्ने मानबहादुर राईको भनाइ छ ।
वडा नम्बर ६ स्थित घुमाउनेडाँडा कृषि सहकारीका अध्यक्ष चन्द्रबहादुर विष्टले गोलभेंडालाई कच्चा पदार्थका रूपमा प्रयोग गरी खाद्य परिकार बनाउनेतिर ध्यान दिनुपर्ने बताए ।
सहिदभूमि गाउँपालिकामा गत वर्ष पौने ५ हजार मेट्रिक टन गोलभेंडा उत्पादन भएको थियो । गाउँपालिकाभित्रका किसानले ११ करोड ८७ लाख रुपैयाँ आम्दानी गरेका थिए । सहिदभूमि गाउँपालिका कृषि विकास शाखाका प्राविधिक सहायक रत्नबहादुर ठाडा मगरका अनुसार ३ हजार ८ सय ८६ घरपरिवारमध्ये करिब ८० प्रतिशत गोलभेंडाको व्यावसायिक खेती गर्छन् ।