डँडेलधुरा : डँडेलधुराको एक मात्र कभर्डहल भत्किँदा यहाँका खेलाडी मर्कामा परेका छन् । लगातारको वर्षाका कारण गत शनिबार राति कभर्डहल भत्किएपछि खेलाडी समस्यामा परेका हुन् । अमरगढी नगरपालिका-४ खलंगामा ३४ वर्षपहिले निर्माण भएको उक्त कभर्डहलको समयमै मर्मतसम्भार नहुँदा जीर्ण अवस्थामा रहेको थियो ।
पुरानो संरचनाको मर्मतसम्भार नहुँदा अविरल वर्षाका कारण भत्किएको जिल्ला खेलकुद विकास समितिका अध्यक्ष राजेन्द्रबहादुर मगरले बताए । ‘विगत एक वर्षदेखि राष्ट्रिय खेलकुद परिषद र प्रदेश सरकारलाई मर्मतका लागि अनुरोध गर्दै आएका थियौं । पछिल्लो समय अमरगढी नगरपालिकासँग पनि अनुरोध गरेका थियौं । सबैले बेवास्ता गर्दा जिल्लाकै एक मात्र कभर्डहल भत्किन पुग्यो’ अध्यक्ष मगरले भने । उनले तत्काल यसतर्फ सम्बन्धित निकायमको ध्यान जानु पर्ने धारणा पनि ब्यक्त गरे ।
कभर्डहल भत्किएपछि जिल्लामा खेलकुद गतिविधि पनि प्रभावित बनेको छ । कभर्डहलमा प्रशिक्षण हुँदै आएको इन्डोर खेलका खेलाडी मर्कामा परेको खेलाडी सुनील तामाङले बताए । ‘भएको एउटा कभर्डहल पनि भत्किएपछि इन्डोर खेलका खेलाडी समस्यामा परेका छन् । खेलाडीको नियमित प्रशिक्षण पनि प्रभावित हुन पुगेको छ’, उनले भने । कभर्डहलमा ब्याडमिन्टन, टेबुलटेनिस, कराँते, बक्सिङ, बुद्धिचालजस्ता खेलहरू सञ्चालन हुँदै आएको थियो ।
प्रतिक्रिया दिनुहोस !
