असई थमन हत्या प्रकरण: मेयर र राजपा महासचिव साधारण तारिखमा रिहा

बर्दिबास : सशस्त्र प्रहरी बलका असई थमन विक हत्या अभियोग लागेका थप दुई अभियुक्तलाई जिल्ला अदालत महोत्तरीले साधरण तारिखमा रिहा गरेको छ ।  हत्या अभियोग लागेका जलेश्वर नगरपालिकाका मेयर रामशंकर मिश्र र राजपा नेपालका केन्द्रीय महासचिव सुरेश पाण्डेयलाई अदालतले साधारण तारिखमा रिहा गरेको हो। 

न्यायाधीश ब्रजेश प्याकुरेलको इजलासले थुनछेक सुनवाइ गर्दै भदौ ४ गते उपस्थित हुन आदेश गरेको रामान्नदप्रसाद अधिकारीले जानकारी दिए । उनीहरुलाई मुलुकी ऐन अदालती बन्दोबस्तको ४७ नम्बर बमोजिम साधारण तारिखमा रिहा गरिएको हो ।

चार घण्टासम्म चलेको थुनछेक बहसले उनीहरुलाई साधारण तारिखमा रिहा गरेको हो । प्रदेश २ का सामाजिक विकास राज्यमन्त्री अभिराम शर्मा अदालतमा हाजिर भएर सोमबार सामान्य तारेखमा छुटेका थिए ।

२०७२ भदौ २५ गते मधेस आन्दोलनका क्रममा आन्दोलनकारीको तर्फबाट घाइते भएका सशस्त्र प्रहरीका असई विकलाई उपचारको लागि जलेश्वरबाट जनकपुर लानेक्रममा उम्बुलेन्सबाट थुतेर कुटपिट गर्दै हत्या गरिएको थियो । 

शसस्त्र प्रहरी बल सीमा सुरक्षा कार्यालय महोत्तरीको पत्र र असई थमनका दाइ प्रेमबहादुर विकको जाहेरीले नेपाल सरकारवादी विरुद्ध सञ्जयकुमार साह समेत प्रतिवादी रहेको कर्तव्य ज्यान मुद्दामा उनीहरु आरोपी हुन् । 

असई विकको हत्यामा संलग्न २८ जनाको नामै किटेर उनका दाजु प्रेमबहादुरले २०७२ असोज १ गते जिल्ला प्रहरी कार्यालय, महोत्तरीमा जाहेरी दिएका थिए । त्यही जाहेरीको आधारमा जिल्ला अदालत महोत्तरीले २०७२ फागुन २७ गते बयानका लागि इजलाससमक्ष पेश गर्न र फरार रहेका प्रतिवादीको हकमा वारेन्टको ७० दिने म्यादी पूर्जी जारी गरेको थियो।