प्रदेश ७ ब्युरो
धनगढी : निर्मला पन्तका हत्यारा पत्ता लगाई कारबाही माग गर्दै कञ्चनपुर केन्द्रित रहेको आन्दोलन शनिबार कैलालीसहित प्रदेशका पहाडी जिल्लामा पनि सुरु भएको छ । कञ्चनपुर जिल्ला सदरमुकाम महेन्द्रनगरमा दिनभरि कफ्र्यु लागे पनि पूर्व–पश्चिम राजमार्गको गुलरियादेखि भाँसीसम्मको क्षेत्रमा शनिबार पनि दिनभरि प्रदर्शन भयो ।
प्रदर्शनमा विभिन्न विद्यालयका छात्रछात्रा र स्थानीयको सहभागिता थियो । कैलालीमा पनि आन्दोलन सुरु भएको छ । प्रदेश ७ कै प्रवेशद्वार रहेको अत्तरिया बजारमा स्वस्फूर्त रूपमा स्थानीयले शनिबार बिहानैदेखि नाराजुलुस गर्दै बजार र यातायात बन्द गराए ।
अत्तरिया बजार बन्द गरियो भने अत्तरियामै यातायात बन्द भएपछि कैलाली र कञ्चनपुरबाट प्रदेश ७ को पहाडी जिल्लातिर चल्ने यातायात ठप्प भए । संघीय राजधानी र पूर्वी रुटमा चल्ने सवारीसाधन पनि बन्द भए । अत्तरियामा विद्यार्थीसहित स्थानीयले नाराबाजी गर्दै जुलुस निकालेका छन् ।
उता, डोटीमा समेत प्रदर्शन भएको छ । हत्यारा पहिचान गरी कारबाही माग र कञ्चनपुरमा शुक्रबार भएको गोलीकाण्डको विरोधमा ¥याली निकालिएको हो ।
डोटीका नागरिक अगुवाले निकालेको ¥यालीले बजार परिक्रमा गरी विरोधसभासमेत ग¥यो । हत्यामा संलग्न दोषीलाई तत्काल पक्राउ गरी कानुनी सजाय दिनुपर्ने माग उनीहरूको छ । महिलाअधिकार क्षेत्रमा क्रियाशील संघसंस्थासमेत प्रदर्शनमा सहभागी थिए ।
१३ वर्षीया बालिकाको दिनदहाडै बलात्कारपछि हत्या गरिएको भन्दै अहिलेसम्म अपराधी पक्राउ नपरेकोमा तत्काल अपराधी पत्ता लगाउन माग गरिएको छ ।
बैतडीको मेलौली नगरपालिकाका महिलाले पनि दोषीलाई कारबाही हुनुपर्ने माग राख्दै मेलौली बजारमा नारा–जुलुससहित प्रदर्शन गरेका छन् । मेलौली मन्दिरदेखि सुरु भएको जुलुसमा महिलाले बलात्कारीलाई फाँसी दिनुपर्ने, महिलामाथि हुने हिंंसा अन्त्य हुनुपर्नेलगायत नारा लगाएका थिए ।
कञ्चनपुरमा भइरहेको आन्दोलनको समर्थन गर्दै दोषीलाई कारबाही हुनुपर्ने मागसहित आफूहरूले विरोध प्रदर्शन गरेको महिला सञ्जालका अध्यक्ष रुबि नायकले बताइन् । महिला हरेक क्षेत्रमा हिंसामा परेकाले उनीहरूमाथि हुने हिंसा न्यूनीकरण गर्न कानुनको प्रभावकारी कार्यान्वयन हुनुपर्ने आफूहरूको माग रहेको महिलाले बताएका छन् ।
डडेलधुरामा गरिएको प्रदर्शनमा गृहमन्त्री रामबहादुर थापाको राजीनामा माग गरिएको छ । बागबजारमा निकालिएको स्थानीयको जुलुस कोणसभामा परिणत भएको थियो । कोणसभाका वक्ताले कञ्चनपुरमा निर्दोष जनतामाथि गोली बर्साएको आरोप लगाउँदै गृहमन्त्रीको राजीनामा माग गरे ।
निर्मला हत्याको विरोध र गोलीकाण्डको विरोधमा प्रदेशभरि गरिएको प्रदर्शन ।
प्रतिक्रिया दिनुहोस !
