राष्ट्रसंघीय महासभामा भाग लिन प्रधानमन्त्री न्यूयोर्क जाने
काठमाडौं : संयुक्त राष्ट्र संघको ७३ औं महासभामा भाग लिन प्रधानमन्त्री केपी ओली असोज पहिलो साता न्यूयोर्क प्रस्थान गर्ने भएका छन् । महासभाको उच्चस्तरीय सम्बोधन सत्रमा प्रधानमन्त्री नेतृत्वको नेपाली टोली सहभागी हुनेछ ।
महासभाको औपचारिक आरम्भ असोज २ मा हुने भए पनि उच्चस्तरीय सम्बोधन भने असोज ९ बाट सुरु हुनेछ । प्रधानमन्त्री ओलीले असोज ११ मा सम्बोधन गर्ने कार्यक्रम छ । प्रधानमन्त्रीसँग २० जना आसपासको उच्चस्तरीय प्रतिनिधिमण्डल जाने एक अधिकारीले बताए ।
परराष्ट्रमन्त्री प्रदीपकुमार ज्ञवालीले प्रधानमन्त्री नेतृत्व उच्चस्तरीय टोली नै न्यूयोर्क जाने तयारी भइरहेको बताउँदै भने, ‘नेपालले संविधान जारी गरेपछि सम्पन्न तीनै तहको निर्वाचनपछिको सरकार र राष्ट्रले समृद्धिका लागि चालेको कदमबारे विश्वसमुदायलाई जानकारी दिन प्रधानमन्त्रीस्तरमा नै महासभामा जान आवश्यक रहेको महसुस सरकारले गरेको छ ।’
नेपालले आफ्नो आन्तरिक सफलतालाई विश्व समक्ष बाँड्न सक्नुपर्ने भन्दै त्यसको लागि राष्ट्रसंघ उपयुक्त मञ्च रहेकाले प्रधानमन्त्रीस्तरबाटै सम्बोधन हुने उनले बताए । ‘राष्ट्रसंघ सबै नागरिकका लागि सापेक्ष बनाऔं : शान्त, समान र दिगो समाजको लागि विश्व नेतृत्व र जिम्मेवारी बा“डफा“ड’ मूलमन्त्र तय गरिएको छ ।