तोक्यो : उत्तरी जापानमा गत साताको भूकम्पका कारण सिर्जित पहिरोमा परी मृत्यु हुनेको संख्या ४४ जना पुगेको स्थानीय प्रहरी अधिकारीले जनाएका छन्। भूकम्प पीडितको उद्धार र राहतका लागि अझै पनि दशौं हजार सेना र प्रहरी परिचालन गरिएको छ।
मन्त्रिपरिषद्का मुख्य सचिव योसिहिदे सुगाले हराइरहेका व्यक्तिको खोजी कार्य सकिएको बताए। ‘हराएका व्यक्तिको सूची अधिकारीहरूसँग छैन, सबै भेटिएका छन्’, योसिहिदेले भने। करिब ४० हजार प्रहरी, सेना र अन्य उद्धारकर्मीहरूले अस्थायी शिविरमा आ श्रय लिइरहेका २ हजार ७ सयभन्दा बढी व्यक्तिलाई सहयोग गरिरहेका छन्। गत साता उत्तरी जापानको होक्काइदो द्वीप आसपास केन्द्रविन्दु भएको शक्तिशाली भूकम्प गएको थियो।
मृत्यु भएका अधिकांश व्यक्ति सानो ग्रामीण इलाका आत्सुमाका रहेका छन्। करिब ६.६ म्याग्निच्युडको भूकम्पका कारण माथिबाट बगेको पहिरोले गाउँमा जनधनको ठूलो क्षति गरेको थियो। मुख्य सचिव सुगाले स्थानीय जनतालाई आफ्ना घरमा फिर्ता ल्याउन सरकारले सबै प्रकारको सहयोग उपलब्ध गराउने बताए। उनले भूकम्प प्रभावित क्षेत्रमा ठूलो वर्षा हुने मौसम भविष्यवाणी अझै पनि प्राप्त भइरहेकाले जनधनको सुरक्षालाई सरकारले उच्च प्राथमिकतामा राखेको संवाददाताहरूलाई बताए।
प्राकृतिक प्रकोपका कारण लगातार जनधनको ठूलो क्षति बेहोरेको जापानमा पछिल्लो भूकम्पले थप समस्या सिर्जना गरेको थियो। जापानको पश्चिमी क्षेत्रमा जेबी नामको आँधीले ११ जनाको मृत्यु हुनुका साथै क्षेत्रीय विमानस्थल बन्द गर्नु परेको थियो। दोस्रो कार्यकालका लागि पार्टीभित्र चुनावी प्रचार गरिरहेका जापानका प्रधानमन्त्री सिन्जो आबेले सरकारले जनताको सुरक्षाका लागि हरसम्भव प्रयत्न गरिने बताएका छन्। एएफपी
प्रतिक्रिया दिनुहोस !
