ओखलढुंगा : चम्पादेवी गाउँपालिकाले स्थानीय विषयको नयाँ पाठ्यक्रम निर्माण गरी लागू गरेको छ । गाउँपालिकाभरिका ४३ सामुदायिक विद्यालयमा कक्षा १ मा स्थानीय विषयको नयाँ पाठ्यक्रम लागू गरिएको हो । नयाँ पाठ्क्रमको अंकभार कुल सय पूर्णांक रहेको छ ।
नयाँ पाठ्यक्रममा अंग्रेजी, गणित, विज्ञान र सामान्य ज्ञानका विषय समेटिएका छन् । यी विषय चित्रको माध्यमबाट सिकाइने गरी पाठ्यक्रम निर्माण गरिएको गाउँपालिका शिक्षा अनुगमन समितिका संयोजक उज्जन बुढाथोकीले बताए । स्थानीय विज्ञहरूको टोलीले तयार पारेको खाकाका आधारमा गाउँपालिकाले नयाँ पाठ्यक्रम विकास गरेर लागू गरेको उनले बताए ।
पहिलो वर्ष कक्षा १ बाट कार्यान्वयनमा ल्याइएको पाठ्यक्रम क्रमशः कक्षा ५ सम्म लागू हुने बताइएको छ । पाठ्यक्रम र पाठ्यपुस्तक निर्माणका लागि गाउँपालिकाले केही समयअघि स्थानीय विज्ञसहित शिक्षकहरूको समिति बनाएको थियो । उक्त समितिले तयार गरेको पाठ्यक्रमअनुसार सबै विद्यालयमा पाठ्यपुस्तक तयार गरेर पठनपाठन सुरु गरिएको हो । गाउँपालिकाका अनुसार चित्र तथा शिक्षण सामग्रीका माध्यमबाट विषयवस्तु पढाउने गरी पाठ्यक्रम तयार गरिएको छ ।
चित्र तथा शिक्षण सामग्रीका माध्यमबाट विषयवस्तु पढाउने गरी पाठ्यक्रम तयार गरिएको छ।
बाल मनोविज्ञान र स्थानीय परिवेश समेटेर अंग्रेजी माध्यमबाट तयार गरिएको पाठ्यक्रम लागू गरेपछि गाउँपालिकाको शैक्षिक गुणस्तर उक्सने अध्यक्ष नवराज केसीले बताए । गाउँपालिकाले पाठ्यक्रमसँगै शैक्षिक क्यालेन्डरसमेत निर्माण गरी लागू गरेको छ । शिक्षण सिकाइ क्रियाकलापमा एकरूपता ल्याउन गाउँपालिकाभरिका विद्यालयमा एउटै शैक्षिक क्यालेन्डर लागू गरिएको हो । गाउँपालिकामा एक क्याम्पस सात माध्यमिक विद्यालय, ३२ आधारभूत र तीन वालविकास कक्षा गरी ४३ शैक्षिक संस्था छन् ।
नयाँ पाठ्यक्रमले स्थानीय भाषा र संस्कृतिलाई भने बेवास्ता गरेको छ । गाउँपालिकामा मगर, तामाङ, सुनुवारलगायत स्थानीय भाषा पनि प्रचलनमा छन् । जनजातिका भाषा संरक्षणमा गाउँपालिकाले चासो नदिइएको स्थानीयले गुनासो गरेका छन् । लोपोन्मुख वादी समुदायका सवाल पनि सम्बोधन नभएको भन्दै सरोकारवालाहरूले पाठ्यक्रमको विरोध गरेका छन् । यसबारे शिक्षा अनुगमन समितिका संयोजक बुढाथोकीले अधिकांश क्षत्री, ब्राह्मण रहेकाले अन्य भाषामा पाठ्यक्रम र पाठ्यपुस्तक बनाएर लागू गर्न नसकिने बताए ।
त्यस्तै गाउँपालिकाले कक्षा १० सम्म पठनपाठन हुने विद्यालयमा शिक्षक अभावको समस्या समाधान गर्न चालु आर्थिक वर्षबाट कम्तीमा १० जना शिक्षक व्यवस्थापन गर्ने गरी एक करोडभन्दा बढी बजेट विनियोजन गरेको जनाएको छ ।
प्रतिक्रिया दिनुहोस !
