बर्दिबास : महोत्तरीको गौशाला नगरपालिका–७ स्थित फुलहका मुसहर बस्तीका बालबालिकालाई हास्य कलाकार धुर्मुस–सुन्तलीले स्कुल पोशाक वितरण गरेका छन् ।
धुर्मुस–सुन्तली फाउण्डेशनमार्फत कलाकारद्धय ‘धुर्मुस–सुन्तली’ (सीताराम कट्टेल र कुन्जना घिमिरे)ले यसअघि आफैँले अभिभाकत्व ग्रहण गरेका बालबालिकालाई यसपटक स्कुल पोशाक वितरण गरेका हुन् ।
कलाकारद्धय कट्टेल र घिमिरेले मनहर्वा बस्तीका बालबालिका पढ्ने नेपाल राष्ट्रिय जनजाति आधार विद्यालयमा पुगेर यहाँ अध्ययनरत दुई सय ७० जनालाई पोशाक वितरण गरेका हुन् ।
गत बैशाख १३ गते शिक्षाबाट बञ्चित एक सय २५ बालबालिकालाई उनीहरुले नै स्कुल भर्ना गराएर अभिभावकत्व ग्रहण गरेका थिए । विद्यालय भर्ना गर्ने क्रममा उनीहरुले विद्यार्थीलाई शैक्षिक सामाग्री तथा झोला बाँडेका थिए ।
यस क्रममा संगम बुक्स पब्लिकेशनको पनि सहायता रहेको बताइएको छ । दैनिक माछा मारेरै समय गुजार्दै आएका मनहर्वा मुसहर बस्तीका बालबालिकालाई शिक्षामा प्ररित गर्न पोशाक वितरण गरिएको संगम बुक्स पब्लिकेशनका प्रबन्ध निर्देशक एस.पी. सापकोटाले जनाए ।
नेताहरुले अभिभावकत्व ग्रहण गरेका बालबालिका स्कुल पुगे नपुगेको बारेमा निगरानी नरहेकोमा कलाकार कट्टेलले चिन्ता व्यक्त गरे । ‘हामी आफ्नो सन्तान सम्झेर विद्यालय भर्ना गराएको र ती बच्चा भर्ना भएको बच्चा बारे निरन्तर खबरदारी गरिरहेका छौं,’ उनले भने, ‘हामी सरकारलाई सघाउन हिडेका छौँ।’
प्रतिक्रिया दिनुहोस !
