मुसहरका सारथि
बर्दिबास : एकीकृत नमुना मुसहर बस्तीका बासिन्दा शनिबार साँझ उत्साहित देखिन्थे । हातमा सयपत्रीको माला, अविर लिएर बच्चाबच्चीदेखि वृद्धवृद्धासम्म अथितिको व्यग्र प्रतीक्षामा थिए । उनीहरूले घरमा साँझको बत्ती के बालेका थिए, गाडी चढी आइपुगे रामकुमार कार्की ।
महोत्तरीको बर्दिबासस्थित बस्तीका स्थानीयले कार्कीको गलामा माला पहिर्याइदिए । निधारमा टीका लगाइदिए । बालबालिकाले पुष्पगुच्छा दिँदै भने, ‘रामकुमार सर, नमस्कार !’ उनले बालबालिकालाई मिठाई बाँडे ।
उनी स्कुल नजाने बालबालिकालाई पढाउन यो बस्तीमा आउँथे । उनले बर्दिबास नगरपालिकामा दुई वर्ष कार्यकारी अधिकृतको जिम्मेवारी सम्हालेका थिए । उनी यहाँ रहँदा मुसहर बालबालिका पढाउन र उनीहरूका समस्या बुझ्न जान्थे । उनकै पालामा बर्दिबासमा धुर्मुस र सुन्तलीले एकीकृत नमुना मुसहर बस्ती निर्माण गरेका थिए । बस्ती निर्माणको जस उनलाई पनि जान्छ । जनप्रतिनिधि नभएका बेला कार्कीले सरकारी कार्यालयबीच समन्वयकारी भूमिका निर्वाह गरेको स्थानीय गोविन्द पौडेलले जनाए ।
मुसहर बस्ती अहिले बर्दिबासको मात्र नभई क्षेत्रकै घुम्ने स्थानमा परेको होटल तथा पर्यटन व्यवसायी संघ प्रदेश २ का अध्यक्ष हीरा गौतमको भनाइ छ । मुसहरको जीवनस्तर उकास्न सहयोग गरेकाले कार्कीलाई बस्तीका सबैले सम्मान गर्छन् । मुसहरलाई सहयोग गर्ने सरकारी कर्मचारीमा उनलाई लिइने गरेको स्थानीय ५० वर्षीया मानकी मुसहरले बताइन् ।
कार्की बर्दिबासबाट सरुवा भई धनुषाको मिथिला नगरपालिका र बटेश्वर गाउँपालिका पुगे । उनी अहिले पर्साको बहुदरमाई नगरपालिकाका प्रमुख प्रशासकीय अधिकृत छन् । सहयोगी भावना भएका उनी दसैंको शुभकामना आदानप्रदान गर्न शनिबार साँझ वीरगन्जबाट बस्तीमा आएका थिए ।
‘दसैं आयो’ बोलको गीत घन्किएपछि स्थानीयवासी छमछमी नाच्न थाले । स्थानीयको आग्रहपछि उनी पनि बस्तीवासीसँगै नाचेर दसैंको खुसियालीमा सरिक भए । उनको स्वागतमा बस्तीमा एक घण्टासम्म सांस्कृतिक कार्यक्रम सञ्चालन भएको थियो ।
त्यसपछि स्थानीयले उनलाई घरमै खाना खुवाएका थिए । छुट्ने बेला बस्तीवासीलाई उनले भने, ‘म बर्दिबासबाट सरुवा भएर जहाँ गए पनि यहाँहरूको मायाले मलाई तानेर ल्याउँछ ।’ मुसहर बालबालिका पढेर असल मान्छे बन्नुपर्छ भन्दै गाला सुमसुम्याउँदै उनी बिदा भए । बर्दिबासका शंकर फुयाँलले भने, ‘कर्मले मानवलाई महान् बनाउँछ । भाग्यभन्दा कर्ममा विश्वास गर्नुपर्छ ।’