सिरहा : शुक्रबार सिरहाको लहानबाट प्रहरीले अवैध हतियार र लागु औषधसहित दुई जनालाई पक्राउ गरेको छ । लहान नगरपालिका–४ का २४ वर्षीय रंजित यादव र लहान–५ का २६ वर्षीय रामचन्द्र पासमानलाई पक्राउ गरिएको हो। रंजित यादवको घरबाट दुई थान कटुवा पेस्तोल, राइफलको गोली र लागुऔषध बरामद गरेको प्रहरीले जनाएको छ।
सिरहाका प्रहरी प्रवक्ता तथा डिएसपी माधवराज खरेलका अनुसार यादवको घरमा धानको बोरामा लुकाइ राखेको अवस्थामा दुई थान कटुवा पेस्तोल, केएफ ८ एमएम लेखिएको राइफल र गोली एक थान भेटिएको थियो । त्यसैगरी लागुऔषधहरुमा प्रयोग भइसकेका ८ एम्पुल डाइजेल्याव, ६ एम्पुल फेनारगन, २ एम्पुल लुपिजेसिक, ८ थान सिरिन्ज, ५ ट्याबलेट, डाइलेक्स डीसी १ बोतल बरामद गरिएको डिएसपी खरेलले जानकारी दिए।
गोप्य सूचनाका आधारमा इलाका प्रहरी कार्यालय लहानका प्रमुख डिएसपी राजेश थापाको प्रहरी टोलीले यादवको घर खानतलासी गर्दा हातहतियार र लागुआषौध भेटिएको हो।
पक्राउ परेका यादव र पासमानमाथि अनुसन्धान भइरहेको डीएसपी खरेलले जानकारी दिए। बरामद गरिएका हतियार र लागुऔषधबारे पनि खोजबिन भइरहेको उनले बताए । यादव र पासमानमाथि हातहतियार खरखजना र लागुऔषध दुवै मुद्दा चलाउने प्रहरीले जनाएको छ।
प्रतिक्रिया दिनुहोस !
