‘गुण्डा नाइके’ मकेश्वर महतो पक्राउ
बर्दिबास : लामो समयदेखि प्रहरीको सर्वाधिक खोजीको सूचीमा रहेका महोत्तरीको बर्दिबास नगरपालिका–७ प्रेमनगरका मकेश्वर महतोेलाई प्रहरीले पक्राउ गरेको छ ।
आपराधिक समूहका नाइके महतोलाई प्रहरीले धनुषाको जनकपुर–१४ पिडारी चोकबाट पक्राउ गरिएको प्रदेश २ को प्रदेश प्रहरी कार्यालय जनकपुरले जनाएको छ ।
पक्राउ परेका महतोलाई धनुषाबाट जिल्ला प्रहरी कार्यालय महोत्तरी जलेश्वर ल्याइएको एसपी ईश्वर कार्कीले जनाए । ‘महतोबारे अब थप कुरा खुल्दैछ, उनीमाथि दर्ता भएको मुद्दाका फाइलहरु अध्ययन अनुसन्धान सुरु गरेका छौँ,’ एसपी कार्कीले भने ।
महतोमाथि महोत्तरी जिल्ला अदालतले अपहरण मुद्दामा ९ वर्ष कैद र एक लाख पाँच हजार जरिवना फैसला गरेको जनाइएको छ । उनीमाथि डाँका, अपहरण तथा शरीर बन्धक, कर्तव्य ज्यानको अभियोगमा मुद्दा रहेको प्रदेश प्रहरी कार्यालयका प्रवक्ता डिएसपी दानबहादुर थापाले जनाए ।
अदालत ‘आहुत सिंह’को नामबाट तराईका जिल्लाहरुमा चिनिएका महतोले सशस्त्र भुमिगत समूहका संचालन गरेर आपराधिक क्रियाकलाप गर्दै आएको प्रहरीले बताएको छ । यसअघि भएका विभिन्न घटनाको जिम्मा महतोले लिने गरेका थिए । उनलाई प्रहरीले दश वर्षदेखि खोजी गर्दै आइरहेको बताएको छ । प्रहरीका अनुसार महतो भारतमा लुकेर बस्दै आएको बुझिएको छ ।