काठमाडौं : विभागीय टोली नेपाल पुलिस क्लब र सरस्वती युथ क्लबले पल्सर सहिद स्मारक ‘ए’ डिभिजन लिगमा बराबरी खेल्दै लिगको अन्त्य गरेका छन् । हल्चोकस्थित एपीएफ क्लबको मैदानमा शनिबार भएको आफ्नो अन्तिम खेलमा पुलिस र सरस्वतीले १–१ गोलको बराबरी खेले ।
प्रतिस्पर्धात्मक खेलमा सरस्वतीले ५०औं मिनेटमा पेनाल्टीमार्फत सुरुआती गोल गरेको थियो । सरस्वतीका अफ्रिकी खेलाडी भिक्टोर एमोबीले पेनाल्टीको सदुपयोग गरेका थिए ।
पुलिसका खेलाडीले सरस्वतीका तीर्थ बस्नेतलाई डीबक्सभित्र फल हानेपछि सरस्वतीले पेनाल्टीको मौका पाएको थियो । सरस्वतीको अग्रतापछि जोशिएको पुलिसले तीन मिनेटलगत्तै बराबरी गोल फर्काएको थियो । पुलिसका रवि पासवानले गोल गरेका थिए । रविले नीरकुमार राईको पासमा उत्कृष्ट गोल गरेका थिए । बराबरीसँगै पुलिसको शीर्ष ६ को स्थान जोखिमपूर्ण देखिएको छ । लिगमा सबै १३ खेल सकेको पुलिस १९ अंकसहित तालिकाको छैटौं स्थानमा छ । १४ अंक बनाएको सरस्वती नवौं स्थानमा छ ।
यसैगरी हल्चोकमै भएको अर्को खेलमा च्यासल युथ क्लब र जाउलाखेलले पनि १–१ गोलको बराबरी खेल्दै अंक बाँडेका छन् । प्रतिस्पर्धात्मक खेलमा जाउलाखेलले १०औं मिनेटमा खाता खोल्यो । जाउलाखेलका अरुज सिंहले गोल गरेका थिए । च्यासलले ३२औं मिनेटमा बराबरी गोल फर्काएको थियो । च्यासलका छिरिङ गुरुङले बराबरी गोल फर्काएका थिए ।
लिगको अन्तिम खेलमा बराबरीमा रोकिएको च्यासल १६ अंक जोड्दै आठौं स्थानमा छ । १३ अंक बनाएको जाउलाखेल १०औं स्थानमा छ । लिगमा विजेता र उपविजेताको टुङ्गो लागिसकेको छ । मनाङ दुई खेलअगावै च्याम्पियन बनेको छ । यस्तै संकटा एक खेलअगाडि उपविजेता बनिसकेको छ । तेस्रो स्थानका लागि थ्रीस्टार र त्रिभुवन आर्मी क्लब दौडमा छन् ।
प्रतिक्रिया दिनुहोस !
