बार्सिलोना : पहिलो लेग खेलमा पराजित भएको बार्सिलोना दोस्रो लेगमा उत्कृष्ट पुनरागमन गर्दै कोपा डेल रे फुटबल प्रतियोगिताको क्वार्टरफाइनलमा पुगेको छ। अन्तिम १६ टोलीबीचको भिडन्तको शुक्रबार बिहान खेलिएको दोस्रो लेग खेलमा बार्सिलोनाले लेभान्तेलाई ३-० गोलले हरायो।
उक्त नतिजापछि बार्सिलोना ४-२ कुल गोल भिन्नताका आधारमा क्वार्टरफाइनलमा पुगेको हो। गत साता खेलिएको पहिलो लेग खेलमा बार्सिलोना २-१ गोलले पराजित भएको थियो। बार्सिलोनाको घरेलु मैदानमा खेलिएको दोस्रो लेग खेलमा ओसमेन डेम्बेलले दुई र अर्जेन्टिनी स्टार लियोनल मेसीले एक गोल गरे।
फ्रान्सेली खेलाडी डेम्बेलले दुई मिनेटको बीचमा लगातार दुई गोल गरेका थिए। खेल सुरु भएको ३० औं मिनेटमा पहिलो गोल गरेका २१ वर्षीय डेम्बेलले ३१ औं मिनेटमा टोलीको अग्रता दोब्बर बनाएका थिए। ५४ औं मिनेटमा मेसीले टोलीका लागि तेस्रो गोल थपेका थिए।
मेसीले पछिल्ला पाँच खेलमा गरेको यो सातौं गोल हो। पहिलो लेग खेलमा दोस्रो रोजाइका खेलाडीलाई स्थान दिएको बार्सिलोनाले दोस्रो लेग खेलमा भने आफ्ना अधिकांश स्टार खेलाडीलाई मैदानमा उतारेको थियो। बार्सिलोनाले चार वर्षदेखि लगतार कोपा डेल रेको उपाधि जित्दै आएको छ।
बार्सिलोना सबैभन्दा बढी कोपा डेल रे उपाधि जित्ने क्लब पनि हो। हालसम्म बार्सिलोनाले ३० र एथलेटिक बिल्बाओले २३, रियल म्याड्रिडले १९ र एट्लेटिको म्याड्रिडले १० पटक कोपा डेल रेको उपाधि जितेका छन्। यो सिजन भने एट्लेटिको म्याड्रिड उपाधि होडबाट बाहिरिइसकेको छ।
स्पान्योल पनि घरेलु मैदानमा भिल्लारियललाई ३-१ गोलले हराउँदै क्वार्टरफाइनलमा पुगेको छ। स्पान्योल ५-३ कुल गोल भिन्नताका आधारमा अन्तिम आठमा प्रवेश गरेको हो। यी दुई टोलीबीचको पहिलो लेग खेल २-२ गोलको बराबरीमा सकिएको थियो।
यसैगरी रियल सोसिएडाडलाई घर फर्काउँदै रियल बेटिस पनि क्वार्टरफाइनलमा पुग्न सफल भयो। यी दुई टोलीबीचको दोस्रो लेग खेल २-२ गोलको बरबरीमा सकिएपछि कुल गोल भिन्नता पनि २-२ बनेको थियो। त्यसपछि अवे गोलका आधारमा रियल बेटिस क्वार्टरफाइनलमा पुग्न सफल भयो। अघिल्लो साता रियल बेटिसको मैदानमा खेलिएको पहिलो लेग खेल गोलरहित बराबरीमा सकिएको थियो।
प्रतिक्रिया दिनुहोस !
