अरुण तेस्रोको १५ प्रतिशत काम सकियो
खाँदबारी : संखुवासभामा निर्माणधीन बहुप्रतिक्षित अरुण तेस्रो जनविद्युत् परियोजनाको काम हालसम्म १५ प्रतिशत सम्पन्न भएको जनाइएको छ ।
अरुण तेस्रो निर्माणको जिम्मा पाएको सतलज कम्पनीले शुक्रबार तुम्लिङटारमा पत्रकार सम्मेलन गरी आयोजनाको ड्याम्साइड, पावरहाउस क्षेत्र र सडक निर्माणको १५ प्रतिशत काम सम्पन्न गरिएको जानकारी दियो ।
कम्पनीका सीईओ सतिसकुमार शर्माले नौ सय मेघावाटको अरुण तेस्रो आयोजनाको काम तीव्र गतिमा भइरहेको जानकारी दिए । बाँध निर्माणस्थलको मुख्य सुरुङ अन्तर्गतको प्रवेश सुरुङ निर्माणको काम तीन सय ५२ मिटर सम्पन्न भएको उनको भनाइ छ ।
शर्माले अन्य पानीका बहाव मोड्ने सुरुङसहित विभिन्न सुरुङ निर्माणको क्रममा रहेको बताए । अहिलेको प्रगतिअनुसार समयमा काम सम्पन्न गर्न सक्ने अवस्था रहेको शर्माको भनाइ छ । सतलजले विभिन्न कम्पनीलाई छुट्टाछुट्टै ठेक्का दिई आयोजना सञ्चालन गरिरहेको छ ।
समयमा काम सम्पन्न नगर्ने कम्पनीलाई हटाई समयमा काम गर्ने कम्पनीलाई काम दिने गरेकाले पनि समयमा सक्ने आयोजनाको दाबी छ । अरुण तेस्रो निर्माण सम्पन्न गर्न स्थानीयको साथ र सहयोगको अपेक्षा गरिएको आयोजनाले जनाएको छ ।
आयोजनामा हाल दुई हजार ६५ जना भारतीय र नेपाली कामदारले काम गरिरहेका छन् । अयोजनामा आवश्यक पर्ने गिटी, बालुवाका लागि बाँध निर्माणस्थलमा क्रसर स्थापना गरी आवश्यक कच्चापदार्थ उत्पादन गर्ने काम भइरहेको शर्माको भनाइ छ । चार सय केभी प्रसारण लाइनको काम चाँडै सञ्चालनमा ल्याउने अयोजनाले जनाएको छ ।
सात जिल्ला हुँदै उत्पादित विद्युत् ढल्केबरसम्म आयोजनाले लैजाने जानकारी गराइएको छ । आयोजनास्थलसम्म जाने सडक निर्माणको काम पनि आयोजनामार्फत भइरहेको जनाइएको छ ।