सिमरा : रुस्लान दसौँ सिमरा गोल्डकपको उपाधिका लागि शनिवार साबिक विजेता त्रिभुवन आर्मी क्लब र रुस्लान थ्रीस्टार क्लब भिड्दै छन् । सिमरा रङ्गशालामा हुने फाइनल भिडन्त दुवै टिमका लागि इतिहास रच्ने अवसर हुनेछ । छैटौँ र नवौँ संस्करणको विजेता आर्मी तेस्रो पटक उपाधि उचालेर सबैभन्दा बढी जित्ने टोलीमा आफूलाई उभ्याउने दाउमा हुँदा थ्रीस्टार पहिलो पटक उपाधि जितेर इतिहास रच्ने लक्ष्यमा हुनेछ ।
सिमरा गोल्डकपको उपाधि आर्मी र मनाङ मर्स्याङ्दी क्लबले समान दुई÷दुई पटक उचालिसकेका छन् । तेस्रो र चौथो संस्कणको उपाधि उचालेको मनाङले यस पटक भाग लिएन । मनाङ सहभागी नभएकाले आर्मीलाई यो वर्ष सर्वाधिक सफल टोलीकारुपमा उभ्याउने अवसर हुनेछ ।
आर्मी तेस्रो पटक उपाधि उचाल्ने रणनीतिसहित मैदानमा उत्रिँदा थ्रीस्टार भने अघिल्लो संस्करणको फाइनलमा व्यहोरेको हारको बदला लिँदै विजेताको सूचीमा नाम दर्ता गर्ने दाउमा हुनेछ । गत संस्करणमा यी दुवै टिमले उपाधि भिडन्त गरेका थिए । जसमा आर्मी २–० ले बाजी मार्न सफल भएको थियो ।
अघिल्लो वर्ष आर्मीलाई उपाधि दिलाउन गोल गरेका नव युग श्रेष्ठ र दिनेश हेम्जन भने यस वर्ष टिममा छैनन् । लिगमा घाइते भएर आराम गरिरहेका नव युग र हेम्जनको अभाव टिममा खट्किने निश्चित छ । तर पनि विशाल मेमोरियल गोल्डकपको उपाधि दोस्रो पटक जितेर सिमरा आएको आर्मी अघिल्लो वर्षकै नजिता हात पर्नेमा ढुक्क देखिन्छ ।
ए डिभिजन लिगपछि आर्मी र थ्रीस्टारले मोफसलको यो दोस्रो प्रतियोगिता खेल्दै छन् । यसअघि आर्मी विशाल मेमोरियल र थ्रिस्टार खप्तड गोल्डकपमा सहभागी भएका थिए ।
आर्मीले विशाल मेमोरियलको उपाधि रक्षा गर्दा थ्रीस्टार भने नेपाल पुलिससँग उपाधि भिडन्तमा पराजित हुन पुगेको थियो । खप्तडको उपाधि नजिक पुगेर निराश हुँदै फर्किएको थ्रीस्टार आर्मीलाई पराजित गरेर यस सिजनको पहिलो उपाधि उचाल्न उत्साहित देखिन्छ । थ्रीस्टारका प्रशिक्षक मेघराज केसीले एक दशकको इतिहास सिमरा गोल्डकपले रच्दै गर्दा आफूहरू पनि अर्को इतिहास रच्ने लक्ष्यमा रहेको बताए ।
फाइनल यात्रा तय गर्ने क्रममा आर्मीले अर्को विभागीय टिम एपिएफमाथि क्वार्टरफाइनmलमा ४–२ को शानदार जीत हात पारेको थियो । सेमीफाइनलमा पाँचौँ संस्करणको विजेता आयोजक नव जनजागृतिलाई पराजित गरेको थियो । आर्मी र थ्रीस्टारको यो वर्ष मोफसलका प्रतियोगितामा पहिलो भेट हो । यसअघि ए डिभिजन लिगमा दुवै टिमले १–१ को बराबरी खेलेका थिए ।
आर्मीका प्रशिक्षक नवीन न्यौपानेले पनि फाइनल भिडन्त दर्शकलाई मनोरञ्जन दिने गरी हुने बताए । ‘दुवै टिम उस्तै छन्, प्रतिस्पर्धा राम्रो हुन्छ' केसीले भने, ‘हारजित आफ्नो ठाउँमा छ, अवसरलाई सही समयमै सदुपयोग जसले गर्न सक्छ, उसैले उपाधि लैजाने हो ।'
प्रतिक्रिया दिनुहोस !
