भारतीय जलसेना प्रमुखको चेतावनी : अझै ठुलो आतंकवादी हमला हुन सक्छ
फागुन २१, २०७५ मंगलबार १७:३६:०
नयाँ दिल्ली : भारतीय जलसेनाका प्रमुख सुनील लाम्बाले देशमा अझै ठुलो आतंकवादी आक्रमण हुन सक्ने चेतावनी दिएका छन् । कश्मीरको पुलवामामा भएको चरमपन्थी हमला भन्दा ठुलो हमला समुद्री मार्गबाट हुन सक्ने आशंका गर्दै सजग हुन चेतावनी दिएका हुन् ।
देशका विभिन्न जासुसी संस्थाको रिपोर्टलाई उधृत गर्दै उनले ठुलो आक्रमणका लागि आतंकवादीहरुलाई प्रशिक्षण दिइरहेको खुलासा गरेका छन् ।
तनावयुक्त सम्बन्ध रहेको पाकिस्तानको नाम नलिइ उनले आतंकवादी हमलाको षड्यन्त्र चरमपन्थीहरुले गरिरहेको पनि उल्लेख गरेका छन् । लाम्बाले चरमपन्थीहरुलाई भारत सधैँ अस्थिर रहिरहोस भन्ने चहाना राख्ने देशले सघाइरहेको पनि जिकिर गरेका छन् ।
यसैबीच पाकिस्तान नौसेनाले एक भारतीय सबमरीन आफ्नो सीमामा अवैधरुपमा पसेको दाबी गरेको छ। पाकिस्तानले स्थानीय सञ्चारमाध्यममा त्यो सबमरिनको तस्बिर पनि सार्वजनिक गरेको छ ।
पाकिस्तानले सार्वजनिक गरेको तस्बिरलाई भारतीय सञ्चारमाध्यमले पनि वास्तविक भनिरहेका छन्। यो तस्बिर ४ मार्च राति आठ बजे सार्वनजिक गरिएको हो । पाकिस्तानी नेभीका प्रवक्ताका अनुसार भारतीय सबमरिनलाई आफ्नो जल सीमामा पस्न नदिनका लागि 'विशेष तरिका' को प्रयोग गर्नु परेको थियो ।
पुलवामामा भन्दा ठुलो आक्रमण
भारतीय जलसेना प्रमुखले तीन साता पहिले जम्मु-कश्मीरको पुलवामामा भएको आत्मघाती हमला भन्दा ठुलो आक्रमण हुन सक्ने बताएका हुन् । यो घटनामा केन्द्रीय रिजर्भ पुलिस फोर्का ४० जना मारिएका थिए । उनका अनुसार अब पुलवामा भन्दा ठुलो चरमपन्थी हमला हुन सक्छ ।
भारत-प्रशान्त क्षेत्रमा सक्रिय
लाम्बाका अनुसार भारत-प्रशान्त क्षेत्रमा पनि आतंकवादी सक्रिय छन् । यस क्षेत्रमा पछिल्ला केही सालयता आतंकवादीले आफ्नो गतिविधि बढाइरहेका छन् । उनका अनुसार विश्वमा केही देशमा मात्रै आतंकवादले छुन सकेको छैन । यसको खतरा अब लगातार बढ्दै गएको छ।
प्रतिक्रिया दिनुहोस !
