अर्घाखाँची : सन्धिखर्क नगरपालिका–६ स्थित रातटारीमा यात्रुवाहक माइक्रोबसबाट एक सय ५० ग्राम अवैध सुन बरामद भएको छ ।
काठमाडौंबाट सन्धिखर्क आउँदै गरेको बा ४ ख ५४९८ नम्बरको हायासबाट प्रहरीले अवैध सुन बरामद गरेको हो । अवैध सुन भित्रिँदै गरेको सूचनाका आधारमा प्रहरीले हायास रोकेर चेकजाँच गर्दा उक्त अवैध सुन फेला परेको बताइएको छ ।
चालक सिटतर्फको ढोकामा रहेको पकेटमा सेतो प्लास्टिक झोलाभित्र कागजले बेरेको अवस्थामा सुन फेला परेको जिल्ला प्रहरी कार्यालयका प्रमुख प्रहरी नायब उपरीक्षक नवराज मल्लले जानकारी दिए ।
५० ग्राम तौलका तीन थान सुन फेला परेपछि प्रहरीले हायास चालकलाई सोधपुछ गर्दा सन्धिखर्क बजारस्थित श्रीराम अर्घाखाँची सुनचाँदी पसलका कृष्ण पन्थी सुनारले काठमाडौंबाट मगाएको बयान दिएका थिए ।
त्यसपछि प्रहरीले पसल सञ्चालक सुनारलाई नियन्त्रणमा लिइ सोधपुछ गर्दा उनले सुन अवैध भएको स्वीकार गरेका हुन् । आफ्नो बयानमा सुनारले भुमिकास्थान नगरपालिका–४ घर भइ हाल काठमाडौं बस्ने अजय पौडेलले पठाइदिएको भनी उम्कन खोजेका थिए ।
तर, भन्सार रकम दाखिला गरेको कागजात नभएकोले उक्त सुन अवैध भएको जिल्ला प्रहरी कार्यालय अर्घाखाँचीका प्रहरी नायव उपरीक्षक नवराज मल्लले बताए । उनका अनुसार भन्सार छलेर ल्याइएको उक्त सुनको बजार मुल्य ७ लाख ७४ हजार भन्दा माथि छ ।
माइक्रो चालक सुदिप रायमाझी, पसल सञ्चालक सुनार र पौडेल समेतलाई नियन्त्रणमा लिइ आवश्यक कारवाहीको लागि भन्सार कार्यालय रुपन्देही पठाइएको प्रहरी नायब उपरीक्षक मल्लले जानकारी दिए ।
प्रतिक्रिया दिनुहोस !
