रातुखोला किनारका बासिन्दाको पीडा : मध्यरातमा भागेर बाँचियो

जनकपुर : गत शनिबार मध्यरातमा लालगढको सुनौलो बस्तीका अधिकांश घरभित्र बाढी पसेपछि गाउँमा भागाभाग नै मच्चियो । धेरैले भागेरै ज्यान जोगाए ।

खोलामा पानीको बहाव कम भएपछि भने उनीहरु घरमा बस्न थालेका छन् । तै पनि मनबाट त्रास त हटेको छैन । बाढी फेरि आउने डरले गाउँलेहरु निदाउनै नसक्ने बताउँछन् ।

खोलामा पानीको बहाव बढ्यो कि भाग्न तयार छन् उनीहरु । केही दिनयता त खोलामा पानीको बहाव हेर्न गाउँमा पालो नै लगाएको बताउँछिन् स्थानीय रितामाया खप्तरी मगर । ‘खोलो हेर्यो अनि रात काट्यो,’ उनले गुनासो गरिन्, ‘रातु खोलाको बाँध फुट्न लागिसक्यो । बाढी आउँदा १० जनाको परिवार कसरी जोगाउने चिन्ता हुन्छ।’

लालगढ सुनौलो बस्तीका बासिन्दाको गुनासो के छ भने, सरकारले क्रसर बन्द नगराउँदा, बाँध मर्मत नगर्दा बाढीले यसरी वितण्डा मच्चायो । लालगढ सुनौलो बस्तीकी गीता श्रेष्ठ भन्छिन्, ‘हामीले रोक्दा रोक्दै बाँध नजिकबाटै बालुवा, गिट्टी झिकियो । गुनासो पनि गरियो तर निसाफ भएन ।’

अविरल वर्षासँगै खोलाको बाढीले बाँध कटान गर्दा गाउँ नै बग्ने खतरा देख्छन् उनीहरु । महोत्तरी र धनुषाको सिमानामा पर्ने रातु खोलाले वर्षासँगै पूर्वी बाँध कटान गरेको छ ।

क्रसरवलाहरुले मापदण्ड विपरित रातु खोला खन्दा तटबन्ध जोखिममा परेको थियो । अहिले सोही क्षेत्रमा बाढीले धमाधम कटान गरिरहेको छ । बाँध कटानसँगै धनुषाको लालगढस्थित सुनौलो बस्ती, महोत्तरीको बर्दिबास नगरपालिकोको किसानगर, पशुपतिनगरका हजारौं बासिन्दा बाढीको त्रासमा बाँचिरहेका छन् । स्थानीय जनप्रतिनिधिले पनि यस्तो गुनासो नसुन्ने गरेको बताउँछन् सुनौलो बस्तीका बासिन्दा ।