कृषि मेलामा केशरदेखि उखुसम्म (फोटो फिचर)
डोल्पा : डोल्पामा जिल्लास्तरीय कृषि प्रर्दशनी मेला सम्पन्न भएको छ । मेलामा जिल्लाका कृषकले उत्पादन गरेको विभिन्न कृषिजन्य उत्पादन प्रर्दशनीमा राखिए ।
यस क्रममा उत्कृष्ट कृषक समूह, सहकारी, कृषकलाई नगद र प्रमाणपत्र पनि प्रदान गरियो । कर्णाली प्रदेशसभा सदस्य सांसद वीरबहादुर शाहीले केशरको बिरुवामा पानि राखेर मेलाको उद्घाटन गरेका थिए ।
तेलहन, दलहन र फलफूलले भरिपूर्ण मेला सयौं मानिसले अवलोकन गरेका थिए । डोल्पामा अर्गानिक तरकारी तथा फलफूल उत्पादन बढ्दो भएकाले सबैले कृषिमा ध्यान दिनुपर्ने वक्ताहरुको भनाइ थियो ।
मेलामा सहभागी कृषकले सान्त्वना स्वरुप प्रमाणपत्र र नगद सहित सम्मान पाएका हुन् । मेलामा जिल्लाका अपत्यारिला स्याउ, ओखर, मुला, लौका लगायत अन्य कृषि उत्पादन राखिएका छन् भने स्याउ, आरुका जुस जाम र चाना पनि राखिएका छन् ।