बागलुङ : बागलुङ-२‘ख’मा भएको उपनिर्वाचनको मतगणनामा बाम गठबन्धनले सुरुवातमै अग्रता लिएको छ। आइतबार मध्यान्हदेखि सुरु भएको मतगणनाको पछिल्लो मत परिणाम अनुसार राष्ट्रिय जनमोर्चाका उम्मेदवार ३ सय ५४ मतले अगाडि छन्।
पछिल्लो मत परिणाम अनुसार ढोरपाटन नगरपालिका-१ र २, निसीखोला गाउँपालिका-१ र २, तमानखोला गाउँपालिका-१ र २ को मतगणनामा राजमोका उम्मेदवार खिमविक्रम शाहीले २९ सय ६४ मत प्राप्त गरेका छन्।
नेपाली कांग्रेसका उम्मेदवार जित शेरचनले भने २६ सय १९ मत प्राप्त गरेका छन्। समाजवादी पार्टीका अशोक बिकले १ सय ३१, बागी उम्मेदवार शेरमान घर्तीको क्लिप चिन्हमा ४८, स्वतन्त्र उम्मेदवार सन्तोष भण्डारीले १५, राप्रपा संयुक्तका निमबहादुर भण्डारीले ११ मत प्राप्त गरेका छन्।
१ सय ७ मत बदर भएको छ। वडागत रुपमा तिनै स्थानीय तहको पालैपालो गणना गरिएको छ। कुल ३५ हजार १ सय ८४ मतदाता रहेको बागलुङमा यस पटक २१ हजार ४ सय मत खसेको छ। अघिल्लो निर्वाचनमा ६५ प्रतिशत मत खसेको थियो। आज राति अबेरसम्ममा अन्तिम मत परिणाम आउने जिल्ला निर्वाचन अधिकारी विकासचन्द्र शर्माले जानकारी दिए।
प्रतिक्रिया दिनुहोस !
