राजविराज : शीतलहरका कारण अत्यधिक चिसो बढेको भन्दै सप्तरीको विभिन्न स्थानीय तहले विद्यालय बन्द गरेका छन् । राजविराज नगरपालिकाले आइतबारदेखि मंगलबारसम्मका लागि तीनदिन सामुदायिक तथा संस्थागत विद्यालय बन्द गर्ने निर्णय गरेको जनाएको छ । राजविराज नगरपालिका अन्तर्गतका ४२ वटा विद्यालय तीन दिनसम्म बन्द गर्ने निर्णय भएको नगरप्रमुख शम्भुप्रसाद यादवले बताए ।
चिसो हावासँगै ठण्डी बढेकाले बालबालिका बिरामी पर्न सक्ने भन्दै तिलाठी कोइलाडी गाउँपालिकाले पनि चार दिनका लागि सामूदायिक विद्यालय बन्द गर्ने निर्णय गरेको छ । गाउँपालिका अध्यक्ष सतिशकुमार सिंहका अनुसार उक्त गाउँपालिकाका १७ वटा सामूदायिक विद्यालयहरू बन्द गरिएको छ ।
सप्तकोशी नगरपालिकाले बिहीबारदेखि पाँच दिनका लागि नगरपालिकाभित्रका सबै सामुदायिक विद्यालय बन्द गर्ने निर्णय गरेपछि सोमबारसम्मका लागि विद्यालयर बन्द छन् । सप्तकोशी नगरपालिकामा ७ वटा आधारभूत र ४ वटा माध्यमिक विद्यालय बन्द रहेको नगर प्रमुख उत्तम शर्माले बताए ।
चिसोका कारण विद्यालय आउने विद्यार्थीको संख्या पनि घटदै गएको शिक्षक बताउँछन् । सामुदायिक विद्यालयमा अध्ययनरत अधिकांश विद्यार्थी दलित र विपन्न परिवारका भएकाले बाक्लो र पर्याप्त कपडा अभावमा विरामी पर्न सक्ने सम्भावना रहेकोले अभिभावकले विद्यालय पठाउन छाडेका छन् ।
बलान विहुल गाउँपालिकाले पनि आइतबारको मौसमको अवस्था मूल्याङ्कन गर्न केही बेरमा बैठक बस्न लागेको जनाएको छ । गाउँपालिका अध्यक्ष दयानन्द गोइतले आइतबार पनि मौसममा सुधार नआएकाले विदाका बारेमा प्रधानाध्यापकसँग सल्लाह भइरहेको र बैठकबाट निर्णय गरी सूचना गरिने बताए ।
दिनभरी बाक्लो हुस्सु लाग्ने र कठ्यांग्रिने जाडो बढेकाले त्यसको असरबाट बच्न जिल्लाको विभिन्न स्थानको सार्वजनिक स्थल र चोकमा स्थानीय तह, वन कार्यालय, प्रहरी र स्थानीयवासीले काठ, दाउरा थुपारी आगो बालेका छन्।
प्रतिक्रिया दिनुहोस !
