वीरगन्ज : वीरगन्जमा जारी प्रदेश २ स्तरीय प्रथम गिरिजाप्रसाद कोइराला गोल्डकप फुटबलमा आइतबार रौतहट र महोत्तरी भिड्दैछन् । वीरगन्जको आदर्शनगर रंगशालामा यी दुई समूह बीचको खेल दिउँसो २ बजे देखि सुरु हुनेछ । यसअघ शनिबार भएको उद्घाटन खेलमा धनुषाले पर्सालाई हराएको थियो ।
उद्घाटन खेलमा धनुषाले ट्राइबेकरमा ४-२ गोलले हराएको हो । निर्धारित ८० मिनेटको खेलमा दुवै टोलीबाट एक- एक गोलको बराबरी भएपछि खेल ट्राइबेकरमा धकेलिएको थियो । ट्राइबेकरमा धनुषाका लागि चार खेलाडीले गोल गर्न सफल भएका थिए । तर पर्साका चारमध्ये दुई खेलाडीले प्रहार गरेको बल, धनुषाको गोलपोष्टको जाली चुम्न असफल भएपछि धनुषाले खेल ४-२ ले जितेको थियो ।
जिपी कोइराला फाउण्डेसन पर्साले आयोजना गरेको प्रतियोगिताको उद्घाटन नेपाली कांग्रेसका केन्द्रीय सदस्य रमेश रिजालले गरेका थिए । उद्घाटन समारोहमा एन्फाका अध्यक्ष कर्मा छिरिङ शेर्पा, कांग्रेस केन्द्रीय सदस्य अजय चौरसीया, जिल्ला सभापति अजय द्धिवेदी , राजपाका सहमहासचिव निजामुदिन समानीलगायतले प्रतियोगिताको सफलताका लागि शुमकामना मन्तव्य व्यक्त गरेका थिए।
माघ २५ गते सम्म चल्ने प्रतियोगितामा प्रदेश २ का आठवटै जिल्लाका जिल्ला फुटबल संघका टिमले भाग लिएका छन् । आठ वटा टिमलाई दुइ समूहमा विभाजन गरिएको छ । समूह 'क' मा पर्सा, बारा, धनुषा र सिराहा छन् । समूह 'ख' मा महोत्तरी, रौतहट, सर्लाही र सप्तरी छन् ।
प्रतियोगिताको उपाधी विजेता टिमले एक लाख ५१ हजार नगद र उपविजेता टिमले ७५ हजार रुपैयाँ नगदसहित कप र मेडल पाउने फाउण्डेसनका सचिव सरोज चौरसियाले जानकारी दिए । 
प्रतिक्रिया दिनुहोस !
