पूर्वसचिवको घरमा रहस्यमय हत्या : प्रारम्भिक अनुसन्धानमा यस्तो देखियो (अपडेट)
माघ २७, २०७६ सोमबार १५:६:०
काठमाडौँ : पूर्वसचिव अर्जुन कार्कीकी पत्नीको हत्या धारिलो हतियार प्रहार गरी भएको प्रहरीको प्रारम्भिक अनुसन्धानले देखाएको छ ।
सोमबार कार्की बिहान सानेपास्थित आफ्नै निवासबाट मन्दिर गएर फर्कँदा पत्नी मुना कार्की अचेत अवस्थामा भेटिएकी थिइन् भने घरमै कामदारको रुपमा रहेका विजय चौधरी डोरीले झुण्डिएर आत्महत्या गरेको अवस्थामा भेटिएका थिए ।
अचेत अवस्थामा रहेकी कार्कीकी पत्नी मुनाको उपचारको क्रममा मृत्यु भएको हो । बेहोस अवस्थामा भेटिएकी मुनालाई उपचारका लागि ललितपुरस्थित स्टार हस्पिटलमा लगिएको थियो ।
महानगरीय प्रहरी परिसर ललिलपुरका प्रमुख एसएसपी टेक राईका अनुसार प्रहरीले घटनाको थप छानविन गरिरहेको छ ।
घटना रहस्यमय देखिएको प्रहरीको भनाइ छ । महानगरीय प्रहरी अपराध महाशाखा र प्रहरी परिसर ललितपुरको टोलीले घटना भएको घरलाई घेरामा राखेर अनुसन्धान गरिरहेको छ।
कामदार झुण्डिएको अवस्थामा भेटिनु र श्रीमति पनि टाउकोमा चोट र नील डामसहित अचेत अवस्थामा भेटिएर मृत्यु हुनुले यो घटना निकै शंकास्पद भएको र एउटा संगठित हत्या हुनसक्ने आशंका गरिएको छ।
दुवै शव पोस्टमार्टमका लागि पाटन अस्पतालमा लगिएको छ। पोस्टमार्टमको रिपोर्ट आएपछि घट्नाको थप रहस्य खुल्ने राईले बताए।
प्रतिक्रिया दिनुहोस !
