इलाम : अखिल नेपाल राष्ट्रिय विद्यार्थी युनियन (अनेरास्ववियू)ले महेन्द्र रत्न बहुमुखी क्याम्पसमा तीन महिनाअघि लगाएको ताला विद्यार्थी र क्याम्पस प्रशासन बीच सहमतिपछि खुलेको छ । क्याम्पस प्रशासनले विद्यार्थीका आंशिक माग पूरा गर्ने भनेपछि आन्दोलनरत विद्यार्थी संगठनले ताला खोलेको हो ।
अनेरास्ववियु क्याम्पस कमिटि अध्यक्ष दर्शन राई र अखिल क्रान्तिकारीका सचिव महिमा गौतमले विज्ञप्ति जारी गरेर क्यामपसमा लगाएको ताला खोलेको जानाएका छन् ।
१८ बुँदे माग राख्दै विद्यार्थीले मंसिर २ गतेदेखि ताला लगाएका थिए । स्ववियु निर्वाचनलाई समेत ध्यानमा राख्दै ताला खोलेको अनेरास्ववियूले जनाएको छ ।
लामो समय तनावमा रहेको क्याम्पस खुलेपछि शैक्षिक वातावरण सहज हुने विद्यार्थीले अपेक्षा गरेका छन् ।
यसअघि असन्तुष्ट विद्यार्थीको समूहले क्याम्पसमा तोडफोड र क्याम्पस प्रमुखको कुर्शी जलाउने क्रियाकलपा गरेपछि शैक्षिक वातावरण बिग्रेको प्राध्यापक र विद्यार्थीले गुनासो गर्दै आएका थिए।
नेपाल विद्यार्थी संघले नेकपाको भातृसंगठन अनेरास्ववियूले क्याम्पस प्रमुख र लेखा शाखामा लगाएको ताला फुटाए पछि क्याम्पसमा थप तनावको स्थिती सृर्जना भएको थियो ।
नेपाल विद्यार्थी संघ लगायतका विद्यार्थी संगठनले नेकपाका स्थानीय नेताको स्वार्थको मारमा परेको आरोप लगाउँदै आएका थिए । नेविसंघका क्याम्पस संयोजक वविन राईले अब स्ववियु निर्वाचनको वातावरण बनाउन सबै संगठन लाग्नुपर्ने बताए ।
यसअघि हिउँदे विदामा क्याम्सप प्रमुख र सहायक क्याम्पसको बेग्ला बेग्लै सूचना आएपछि अदालत पुगेको इलामको महेन्द्र रत्न बहुमुखी क्याम्पसको मुद्धामा उच्च अदालत विराटनगर इलाम इजलासले प्रमुखकै सूचना कार्यान्वायन गर्न आदेश दिएको थियो ।
आदेशपछि क्याम्पस गत माघ ९ गतेबाट क्याम्पसमा पठनपाठन सुरु भएको थियो । अदालतले सुविधा र सन्तुलनको दृष्टिबाट तथा छात्रछात्राको सर्वोत्तम हितलाई मध्यनजर गरी माघ ९ देखि पठन पाठन सञ्चालन गर्न विपक्षीका नाममा आदेश जारी गरे थियो ।
प्रमुख गुरागाईले पुष १५ गते सूचना निकालेर पुष १६ गतेदेखि माघ ८ गतेसम्म विदा गरेका थिए । सञ्चालक समितिका तर्फबाट पुष २२ मा सहायक क्याम्पस प्रमुखको हस्ताक्षरमा पुष २३ गतेदेखि माघ १५ गतेसम्म बिदाको सूचना निकालेका थिए । प्रमुख गुरागाईले पुष २२ गते अदालतमा दायर गरेका थिए ।
सञ्चालक समिति र क्याम्पस प्रमुखको विवादको कारण महेन्द्र रत्न बहुमुखी क्याम्पस लामो समयदेखि अन्योलकाबीच सञ्चालनमा छ । मरब क्याम्पस नेकपाको भागमा परेको क्याम्पसको रुपमा चित्र गरिने गरिएको छ । यतिबेला नेकपाकै दुई गुटको विवादले क्याम्पसको वातावरण तनावपूर्ण बन्दै गएको नेपाल विद्यार्थी संघ इलामका अध्यक्ष प्रकाश भट्टराई बताउँछन् । उनले भने, 'कहिले मुद्धा र कहिलेको तालाबन्दीले क्याम्पसका २ हजार ५ सयभन्दा बढी विद्यार्थीको भविष्य अन्यौलमा पर्न थालेको छ ।
क्याम्पस प्रमुखविरुद्ध लामो समयदेखि खनिएको नेकपाको भातृसंगठनको अबरोधका कारण महेन्द्र रत्न बहुमुखि क्याम्पसको महत्वपूर्ण काम प्रभावित भएको क्याम्पस प्रमुखले जनाउँदै आएका थिए । तालाबन्दीको कारण विद्यार्थीका कतिपय काम क्याम्पस प्रमुखले बाहिर बसेर चलाएका थिए । पुस ९ देखि अनेरास्ववियु र अखिल क्रान्तिकारीले लेखा शाखा, प्रशासन शाखा सहितमा ताल थपेपछि तलबलगायतका काम रोकिएका थिए।
प्रतिक्रिया दिनुहोस !
