राजविराज : प्रहरीले नियन्त्रणमा लिएका एक युवक आइतबार बिहान हतकडीसहित फरार भएका छन् ।
मादक पदार्थ सेवन गरेर आत्महत्या गर्न लागेका बोदे बरसाईन नगरपालिका वडा नम्बर ८ रजापट्टीका ३० वर्षीय महेश यादवलाई आइतबार बिहानै प्रहरीले नियन्त्रणमा लिएको थियो ।
यादवले आत्महत्याको प्रयासका साथै पत्नीलाई कुटपिट गर्न थालेपछि स्थानीयले प्रहरीलाई दिएको सूचनाका आधारमा बिहान पौने २ बजेतिर उनलाई नियन्त्रणमा लिएर प्रहरी चौकी काचनमा राखिएको थियो ।
हिरासतमा राखेको केही मिनेटमै हतकडीसहित यादव फरार भएको चौकीका इन्चार्ज विजयप्रसाद सिंहले जानकारी दिए । फरार यादवको खोजी कार्य भइरहेको प्रहरीले जनाएको छ ।
फरार यादवका वुवा सबुरलाल यादवले केही व्यक्तिहरुसँग मिलेर छोरालाई गायब गरेको प्रहरीमाथि आरोप लगाएका छन् । उनले छोरालाई नियन्त्रणमा लिएसँगै कुटपिट गर्दै लगिएकोले प्रहरीको मनसाय नै गलत देखिएको आशंका व्यक्त गर्दै छोरालाई घर ल्याइदिन आग्रह समेत गरे ।
प्रतिक्रिया दिनुहोस !
