कोरोना त्रास : ३६ विदेशीलाई विमानस्थलबाटै फिर्ता पठाइयो
काठमाडौँ : त्रिभुवन विमानस्थल अध्यागमन कार्यालयले स्वास्थ्य प्रमाणपत्र नल्याएका ३६ विदेशीलाई नेपाल प्रवेशमा रोक लगाएको छ । अध्यागमनले कोरोना भाइरस नभएको व्यहोरा लेखिएको स्वास्थ्य प्रमाणपत्र नल्याई प्रवेश गर्न खोज्ने ३६ विदेशीलाई फिर्ता (इन्ट्री रिफ्युज्ड) गरेको हो ।
फिर्ता पठाइएकामा नेपाली मूलका बेलायती स्वर्णिम गुरुङ पनि छन् । कोरोना भाइरस रोकथाम र नियन्त्रणका लागि अध्यागमनले स्वास्थ्य प्रमाणपत्र नल्याएका विदेशीलाई फर्काउने नीति लिएको छ । अध्यागमनले फागुन २७ देखि सोमबारसम्म ३६ विदेशीलाई फिर्ता गरेको हो । कार्यालय प्रमुख सागर आचार्यले भने, ‘फिर्ता हुनेमा भिसा नलिई आउने विदेशी पनि छन् । स्वास्थ्य प्रमाणपत्र नलिई आउने विदेशीलाई सोही जहाजबाट फिर्ता पठाएका छौँ ।’
विदेशीले त्रिभुवन विमानस्थल अध्यागमन कार्यालयमा सात दिनको स्वास्थ्य प्रमाणपत्र बुझाउनुपर्छ । भिसा र फर्कने टिकट नभएका विदेशीलाई विमानस्थलमा रहेको ‘डिटेक्सन’ कक्षमा राख्ने गरिएको छ । कार्यालय प्रमुख आचार्यले भने, ‘सकेसम्म उनीहरू आएकै जहाजबाट फिर्ता गर्छौँ । केही समस्या भए डिटेक्सन कक्षमा राख्छौँ ।’
कोरोना भाइरस रोकथाम तथा नियन्त्रण उच्चस्तरीय समन्वय समितिको निर्णयबमोजिम गृह मन्त्रालयले अनअराइभल भिसा दिने प्रक्रिया स्थगित गरेको छ । अहिले सम्बन्धित मुलुकको नेपाली दूतावासले मात्र भिसा जारी गर्दै आएको छ ।
विदशी नागरिकले अनिवार्य कोरोना भाइरसबाट संक्रमित नभएको स्वास्थ्य प्रमाणपत्र (हेल्थ रिपोर्ट) बुझाउनुपर्ने निर्णय कन्सुलर सेवा विभागमार्फत नेपालस्थित विदेशी दूतावास र विदेशस्थित नेपाली दूतावासमार्फत सम्बन्धित मुलुकमा पत्राचार गरिएको थियो ।
कोरोना भाइरस संक्रमण फैलन सक्ने त्रासले विदेशी नेपाल आउने क्रम न्यून छ । हवाई सेवाबाट आइतबार ५२ जना विदेशी नेपाल भित्रिए । स्थलमार्गबाट कोही नेपाल प्रवेश गर्न पाउँदैनन् । नेपाल प्रवेश गर्ने विदेशीको विमानस्थलमा ज्वरो परीक्षण पनि गरिन्छ । कोरोना भाइरस विश्वव्यापी रूपमा फैलिन थालेपछि गृह मन्त्रालयले अनअराइभल भिसा रोकेको छ ।