जनकपुरधाम : जानकी मेडिकल कलेजअन्तर्गतको शिक्षण अस्पतालका नर्र्स र कर्मचारी आन्दोलित भएका छन् । जनकपुरधाम–८ स्थित सिटी हस्पिटलका नर्स, कर्मचारीले सेवा ठप्प पारेका छन् । कोरोनाका शंकास्पदको जाँच गर्ने फिवर क्लिनिक सञ्चालनको आवश्यक तयारी नगरी जबरजस्ती काममा लगाएको विरोधमा उनीहरू आन्दोलित भएका हुन् ।
प्रदेश सरकार स्वास्थ्य निर्देशनालयले जानकी कलेजलाई क्वारेन्टाइन तथा आइसोलेसनका लागि छनोट गरे पनि स्वास्थ्यकर्मीलाई उपकरण उपलब्ध नगराई बिरामी जाँच्न दबाब दिएपछि उनीहरू विरोधमा उत्रिएका हुन् । स्वास्थ्यकर्मीको सुरक्षाका लागि चाहिने स्यानिटाइजर, ग्लोब्स, मास्क, गाउनलगायत सामान्य सामग्रीसमेत नदिएकाले बाध्य भएर आन्दोलन गर्नुपरेको उनीहरु बताउँछन् ।
‘नर्सहरु स्वयं सुरक्षित छैनन्,’ अस्पतालकी नर्स विनिता सिंहले भनिन्, ‘हामीलाई पीपीई उपलब्ध गराउनुपर्नेमा हालसम्म मास्क, सेनिटाइजर र गाउनसमेत उपलब्ध गराउन सकेको छैन, हामीले कसरी काम गर्ने ? ’
अस्पतालकी अर्की नर्स पुनम साहले कोरोना संक्रमणको हल्ला चलेदेखि आफूहरुले सुरक्षा सामग्री उपलब्ध गराउन भने पनि अस्पताल व्यवस्थापनले कुनै चासो नदिएको गुनासो गरिन् । ‘अहिले विश्वव्यापी कोरोना संक्रमण फैलिएको छ, हामीलाई पीपीई त परै जाओस्, ग्लोब्स, गाउनसमेत उपलब्ध छैन,’ उनले भनिन्, ‘कसरी बिरामी नजिक जाने ? ’
‘डाक्टरहरु राउन्डमा आउन छोडिसकेको र आए पनि दूरी बनाएर बस्न भन्नुहुन्छ,’ उनले भनिन्, ‘बिरामीसँग दूरी बनाएर बस्ने हो भने मेडिकेसन कसरी गर्ने, बिरामीको हेरचाह गर्न हामी पनि सुरक्षित हुनु प¥यो नि ।’ कोरोना संक्रमण रोकथाम गर्न प्रदेश सरकारले गम्भीरतापूर्वक काम नगरेको भन्दै व्यापक आलोचना भइरहेको छ ।
अहिलेको अवस्थामा रकमभन्दा कोरोनाका शंकास्पदको जाँच गर्न आवश्यक उपकरण, क्वारेन्टाइन, आइसोलेसन बेड, भेन्टिलेटर, ल्याबलगायत अत्यावश्यक रहेकोले त्यसतर्फ सरकारले ध्यान दिनुपर्ने नर्स सुनिता सिंह बताउँछिन् । उनले आफूहरूलाई अस्पतालले ४ महिनाको पारि श्रमिकसमेत नदिएको गुनासो गर्दै भनिन्, ‘हाम्रो ग्यारेन्टी कस्ले गर्छ, सरकारीमा काम गर्नेलाई ७५ प्रतिशत भत्ताा छ, हामीले के पाउँछौं ? ’
‘कोरोना संक्रमण रोकथाम गर्न प्रदेश सरकारले चासो लिनुपर्ने हो, तर ध्यान दिएको छैन । अहिलेसम्म हामी जोखिम मोलेर काम गरिरहेका छौं तर अब सम्भव देखिन्न,’ अर्की नर्स विभा कर्णले भनिन्, ‘बिरामी, कुरुवा आईसीयूदेखि सबै वार्डमा पुग्छन् । यहाँ जाँच गर्ने थर्मल गन छैन, हाम्रो समस्या कस्ले बुझिदिने ।‘ बिरामीका कुरुवासमेत संक्रमित भएको हुनसक्ने उनले बताइन् । उनले भनिन्, ‘हाम्रै सुरक्षाको कुनै ग्यारेन्टी भएन अनि कसरी काम गर्नु ? ’
प्रतिक्रिया दिनुहोस !
