बारामा भेटिएका कोरोना संक्रमित भारतको तबलिगी जमातमा सहभागी भएको खुलासा

सिमरा : बाराको जीतपुरसिमरा उपमहानगरपालिकामा रहेको कोरोना विशेष अस्पतालको आइसोलेसन वार्डमा रहेका दुई जनामा कोरोना संक्रमण देखिएको छ ।  भारतको नयाँ दिल्लीस्थित निजामुद्दिनमा भएको तबलिगी जमातको धार्मिक मेलामा सहभागी भएर नेपाल फर्किएका उनीहरुको पीसीआर रिपोर्टमा कोरोना पोजिटिभ देखिएको हो । 

यद्यपी यसको आधिकारिक जानकारी भने स्वास्थ्य मन्त्रालयले प्रेस ब्रिफिङमार्फत गराउने अस्पतालले जनाएको छ । अस्पतालका चिकित्सकका अनुसार स्वाब रिपोर्टमा कोरोना पोजिटिभको सम्भावना देखिएको र सचेत हुन जानकारी आएको छ । बैशाख १४ गते क्वारेन्टाइन अस्पतालको आइसोलेसनमा राखिएका उनीहरुको स्वाब त्यसैदिन वीरगन्जको कोभिड अस्पतालबाट काठमाडौं पठाइएको थियो । 

संक्रमण देखिनेमा सिम्रौनगढ नगरपालिका ४ हरिहरपुरका ३१ वर्षीय र जीतपुरसिमरा उपमहानगरपालिका ७ जीतपुरका ४३ वर्षीय पुरुष छन् । उनीहरु फाल्गनु २९ (मार्च ११) मा नेपाल फर्किएका थिए । उनीहरुमध्ये सिम्रौनगढ घर भएका व्यक्तिलाई जीतपुरसिमरा उपमहानगरपालिकाको इनर्वासिरास्थित मस्जिद र अर्का व्यक्तिलाई जीतपुरस्थित घरबाट क्वारेन्टाइन अस्पतालमा ल्याइएको थियो । 

उनीहरु बैशाख १४ गते कोरोना संक्रमण देखिएका वीरगन्ज महानगरपालिका १६ ईनर्वाका ५५ वर्षीय पुरुषसँगै नेपाल फर्किएका थिए । वीरगन्जका ती व्यक्तिमा संक्रमण पुष्टि भएलगत्तै कन्टयाक्ट ट्रेसिङ गर्ने क्रममासँगै फर्किएको देखिएपछि उनीहरुलाई सोही दिन आइसोलेसनमा राखिएको थियो । 

कोरोना संक्रमण देखिएपछि उनीहरुलाई वीरगंजस्थित कोभिड अस्पताल पठाउने तयारी गरिएको छ भने उनीहरुको सम्पर्कमा आएका व्यक्तिको खोजी थालिएको छ ।