बैतडीमा भारतबाट आएका एकजनामा आरडीटी रिपोट 'पोजिटिभ '

बैतडी : बैतडीमा क्वारेन्टाइनमा बसेका एकजनाको आरडीटी रिपोट पोजिटिभ देखिएको छ । डिलाशैनी गाउँपालिका १ सरस्वती मावि नानारा क्वारेन्टाइनमा बसेका ५० वर्षीय पुरुषको आरडीटी रिपोट पोजेटिभ देखिएको डिलाशैनी गाउँपालिकाका स्वास्थ्य शाखा प्रमुख नवराज जोशीले जानकारी दिए । 

गत वैशाख १८ गते भारतको धार्चुला नाकाबाट स्वदेश भित्रिएका डिलाशैनी गाउँपालिका १ का ती पुरुषको आरडीटी गर्दा रिपोट पोजेटिभ आएको हो ।  आरडीटीमा पोजेटिभ देखिएका पुरुषलाई जिल्ला अस्पतालको आइसोलेसनमा ल्याउने तयारी भइरहेको स्वास्थ्य कार्यालयका प्रमुख योगेशप्रसाद भट्टले बताए ।

उनले भने, 'आरडीटी रिपोट पोजेटिभ देखिएका ती पुरुषलाई जिल्ला अस्पतालको आइसोलेसनमा राख्छौं । थ्रोट स्वाब संकलन गरेर पीसीआर परीक्षणका लागि धनगढी पठाइनेछ।'

 
नानारा क्वारेन्टाइनमा ७४ र डिलाशैनी गाउँपालिकाका विभिन्न क्वारेन्टाइनमा २२७ जना छन्। तीमध्ये एकजनाको आरडीटी रिपोट पोजेटिभ आएपछि कसैलाई पनि घर नपठाएको स्वास्थ्य शाखा प्रमुख जोशीले बताए । 

आरडीटी पोजेटिभ देखिएका पुरुषको पीसीआर रिपोटको नआउँदासम्म सबैलाई क्वारेन्टाइनमा राखिने उनले बताए ।