पिसिआर जाँच नहुँदा पर्सामा ५ दिन यता नयाँ संक्रमित भेटिएनन्

वीरगन्ज : पिसिआर परीक्षण प्रभावित हुँदा पर्सा जिल्लामा ५ दिन यता थप नयाँ संक्रमित  भेटिएका छैनन् । एक सातादेखि पिसिआर परीक्षण कार्य प्रभावित हुँदा जेठ ३ पछि नयाँ संक्रमित  नथपिएको जिल्ला स्वास्थ्य कार्यालय पर्साका अधिकृत जयमोद ठाकुरले बताए । 

पर्सा जिल्लामा पहिलो पटक चैत २९ गते ३ जना भारतीय मुस्लिम जमातीमा कोरोना संक्रमण भेटिएको थियो । त्यसयता बैशाख १४ गते २, बैशाख १५ , बैशाख १७,  बैशाख २१ मा १-१ जना, बैशाख २४ मा १७,  बैशाख ३० मा ५७, बैशाख ३१ मा ३, जेठ २ मा ४ र जेठ ३ मा २ जना संक्रमित  भेटिएका थिए । 

भिटिएम किट, प्रयाप्त मात्रामा नहुँदा शंकास्पद व्याक्तिको स्वाब संकलन गरी पिसिआर परीक्षण हुन नसकेका कारण जिल्लमा जेठ ३ गते यता नयाँ संक्रमित  नथपिएको ठाकुरको भनाइ छ । नारायणी अस्पतालका मेडिकल सुपरिटेन्डेन्ट डाक्टर मदनकुमार उपाध्यायका अनुसार भिटिएम किटको कमीले पर्सामा गत सोमबार र मङ्गलबार २ दिन स्वाब संकलन कार्य नै रोकिएको थियो ।

तर मङ्गलबार बेलुकी स्वास्थ्य मन्त्रालयले पर्सामा १ हजार थान भिटिएम पठाइदिएपछि बुधबारदेखि भने फेरि स्वाब संकलन कार्य सुरु गरिएको छ । 

नया संक्रमित  भेटिएन भनेर ढुक्क हुने अवस्था छैन

अहिलेसम्म भेटिएका ९१ संक्रमितको कन्टयाक्ट ट्रेसिङमा उनीहरुको सम्पर्कमा रहेको पहिचान गरिएका सबै व्याक्तिको किट अभावका कारणले स्वाब संकलन हुन नसकेको ठाकुरले बताए । उनले भने, ‘यदि ती सबैको परीक्षण भएको भए अहिलेसम्म थप धेरै पोजेटिभ केश आइ सक्थ्यो होला त्यसैले ५ दिन यता नयाँ केश देखिएन भनेर ढुक्क हुन सक्ने अवस्था छैन । पछिल्लो पटक प्रयोगशालामा पठाइएको स्वाबको रिपोर्ट सम्भवत शुक्रबार वा शनिबारदेखि आउन सुरु हुन्छ', ठाकुरले भने,‘रिपोर्ट आउन थालेपछि नयाँ संक्रमित  थपिने सम्भावना बढी नै छ  ।' 
 
 ५९७ जनाको रिपोर्ट आउन बाँकी  
 
मङ्गलबार बेलुकी स्वास्थ्य मन्त्रालयबाट १ हजार भिटिएम आएपछि बुधबार पर्सामा २ सय २१ जनाको स्वाब संकलन गरिएको छ । जिल्ला स्वास्थ्य कार्यालय पर्साका अधिकृत ठाकुरका अनुसार बुधबार छिपहरमाई गाँउपालिकामा ९६ , सखुवा प्रसौनी गाँउपालिकामा ५३ र वीरगन्जको नारायणी अस्पतालमा ७२ जनाको स्वाब संकलन गरिएको छ । 
 
जिल्ला स्वास्थ्य कार्यालय पर्साका अनुसार पर्सा जिल्लामा अहिलेसम्म (बधुबारसम्म) पिसिआर परीक्षणका लागि २ हजार ५ सय ३९ जनाको स्वाब संकलन गरिएको छ । जसमध्ये एक हजार ९ सय ४२ जनाको रिपोर्ट आइसकेको छ भने ५ सय ९७ जनाको रिपोर्ट आउन बाँकी छ ।

नारायणी अस्पतालमा गत बैशाख २३ गतेदेखि पिसिआर परीक्षण ल्याब संचालनमा आइसकेको छ । जिल्लामा संकलित स्वाब सुरुमा नारायणी अस्पतालकै ल्याबमा परीक्षण गरिन्छ । त्यसपछि उक्त स्वाब रुजुका लागि काठमाडौंको राष्ट्रिय जनस्वास्थ्य प्रयोगशालामा पठाउने गरिएको छ । काठमाडौंको प्रयोगशालाबाट रिपोर्ट आएपछि मात्रै सार्वजनिक गर्ने गरिएको छ ।