७५ दिनपछि खुलेको वीरगन्ज बजार (तस्बिर)

वीरगन्ज : वीरगन्जमा ७५ दिनपछि पसल खुलेका छन् । कोरोना महामारी नियन्त्रणका लागि चैत ११ देखि लकडाउन सुरु भएदेखि नै वीरगन्जका पसल बन्द थिए । आलोपालो गरी व्यपार व्यवसाय सन्चालन गर्न स्थानीय प्रशासनले अनुमति दिएपछि शनिबारदेखि पसल खुलेका हुन् ।

सरकारले कोरोना नियन्त्रणका लागि विकल्प नदिइ लकडाउन मात्रै थप्दै गएकाले अब लकडाउन मानेर पसल बन्द गर्न नसक्ने भन्दै व्यपारीले केही दिन यता प्रदर्शन गरेका थिए । व्यपारीको प्रदर्शन  र दबावपछि स्थानीय प्रशासनले जोरबिजोर गते तोकेर पसल आलोपालो खोल्न अनुमति दिएको हो ।   
 

'अढाइ महिनामा घरबेटीलाई सटरको भाडा मात्रै १ लाख तिर्न बाँकी छ ४ जना कर्मचारीको तलब अलग्गै छ', घण्टाघर स्थित सागर इम्पोरियमका सञ्चालक उमांशकर साहले भने,‘यो लकडाउनमा पसल १ दिन पनि पुगिनँ तर ऋण करिब २ लाख थपिएको छ ।' 

उनले थपे ,‘ तर अब बजार खुलेको छ , १-२ सातामा व्यपार फेरि पहिलेकै अवस्थामा पुग्छ  होला, यही आशा गरेका छौं।' 

वीरगन्ज उद्योग वाणिज्य संघका अध्यक्ष कोपाल केडियाले बजार खुलेपछि यहाँका व्यपारी व्यवसायीमा फेरि खुशी फर्किएको बताए । व्यपारीको आग्रहमा लकडाउन खुकुलो पारेर व्यपार व्यसाय सञ्लनका लागि अनुमति दिने स्थानीय प्रशासनको निर्णय स्वागत योग्य रहेको पनि उनले बताए । 
'यदि स्थानीय प्रशासनले यो निर्णय गर्न ढिला गर्थ्यो भने यहाँका व्यपारी लकडाउन मानेर बस्न सक्ने अवस्था देखिएको थिएनु' , उनले भने, ‘ढिलै भए पनि स्थानीय प्रशासनको निर्णय स्वागत योग्य छ ।' 

संघका अनुसार वीरगन्जमा मात्रै थोक र खुद्रा गरी २ हजारभन्दा बढी पसल छन् । तीमध्ये आधाभन्दा बढी पसल अरुको घरमा बहाल लिएर सञ्लन भएका छन् । ७४ दिनसम्म पसल बन्दा हुँदा वीरगन्जका व्यपारीलाई घर बहालको मात्रै झण्डै १ करोड रुपैयाँ ऋण थपिएको अनुमान रहेको संघका अध्यक्ष केडियाले बताए । घर बहालबाहेक पसलमा काम गर्ने मजदुर कर्मचारीको तलब बैंकबाट लिएको ऋणको ब्याज सरकारलाई  तिर्नुपर्ने कर सबै बाँकी नै रहेकाले व्यपारी ऋणको भार थपिएको उनले बताए । 

तर शनिबारदेखि बजार खुल्न थाले पछि यसले व्यपारीलाइ राहत भएको भन्दै उनले भने, ‘आशा छ सरकार र प्रशासनले व्यपारीमा फर्किएको यो खुशी खोस्दैन होला ।'