मलंगवा : सर्लाहीको विष्णु गाउँपालिकाको क्वारेन्टाइनबाट भागेका ५ कोरोना भाइरस संक्रमितलाई प्रहरीले पक्राउ गरेको छ । सोमबार विष्णु गाउँपालिकामा फेला परेका ३४ संक्रमितलाई वडा नं. ३ मधुवनगोठको स्वास्थ्य चौकीबाट गाउँपालिकाको बत्रौल स्थित स्वास्थ्य चौकीमा बनाइएको आइसोलेशनमा ल्याउने क्रममा राती ९ बजे ६ जना फरार भएका थिए । फरारमध्ये एकजनालाई तत्कालै पक्राउ गरिए पनि बाँकी ५ जना फरार हुन सफल भएका थिए ।
एम्बुलेन्समा हालेर आइसोलेशनमा ल्याउन खोज्दा उनीहरु फरार भएका थिए । फरार भएकालाई मंगलबार बिहान गाउँबाहिर रहेको एउटा झोपडीमा लुकेको अवस्थामा पक्राउ गरिएको जिल्ला प्रहरी कार्यालय सर्लाहीका प्रहरी उपरीक्षक विश्वमणी पोखरेलले जानकारी दिएका छन् । प्रहरीसँग मास्क र सुरक्षा अपनाउने कुनै समान नहुँदा उनीहरु भाग्न सफल भएका थिए । तर, बिहान उनीहरुलाई फेरी पक्राउ गरेर आइसोलेशनमा ल्याइएको प्रहरी उपरीक्षक पोखरेलले बताए ।
३४ जनामध्ये २९ जनालाई गाउँपालिकाकै आइसोलेशनमा राखिएको र फरारहरुलाई मलंगवा २ स्थित सन्त अल्पमाई रामनारायण यादव नर्सिङ्ग कलेजमा बनाइएको आइसोलेशनमा ल्याएर राखिएको प्रमुख जिल्ला अधिकारी मोहनबहादुर जिसीले जानकारी दिएका छन् । फेरि पनि बदमासी गर्छ कि भनेर गाउँपालिकामा नराखी जिल्ला सदरमुकाम मलंगवामा ल्याइ राखेको प्रजिअ जिसीले बताए । फरार नभटेए उनीहरुका परिवारलाई पनि आइसोलेशनमा ल्याएर राख्ने योजना थियो । भागेर घरमा जान सक्ने अनुमान थियो । तर, घरमा नगएका प्रजिअ जिसीले बताए।
स्वाब संकलनको रिपोर्ट आउन ढिलाइ हुँदा क्वारेन्टाइन बस्ने रुष्ट बनेका छन् । केही दिन अगाडि गोडैताको मधुबनी क्वारेन्टाइनबाट पनि १० जना फरार भएका थिए । उनीहरुलाई प्रहरीले घरबाट पक्राउ गरी क्वारेन्टाइनमा राखेका थिए ।
प्रतिक्रिया दिनुहोस !
